Kanikulda Qanlıkólge!!!

Húrmetli Qaraqalpaqstanlılar hám respublikamız miymanları!

Qaraqalpaqstan Respublikası Qanlıkól rayonında 30-iyun sánesinen baslap turizm máwsiminiń ashılǵanlıǵın xabarlaymız.
Eger, jazǵı dem alıs waqtıńızdı ata-analarıńız, shańaraq aǵzalarıńız hámde perzentlerińiz yamasa doslarınız benen gózzal tábiyat qushaǵında, kól boyında, mazmunlı hám kewilli ótkermekshi bolsańız, Sizdi paytaxttan 80 km aralıqta, «Nókis-Qońırat-Moynaq» avtojolı boyında jaylasqan Qanlıkól rayonına shaqıramız!!!

Eger Siz respublikamızda birden-bir «90-jıllar muzeyi» hám «Kitaplar esteligi», barlıq qolaylıqlarǵa iye milliy qara úyler, jılqılarǵa minip gózzal, janlı tábiyat qushaǵında sayaxatqa shıǵıw, milliy hám tuwısqan xalıqlar taǵamları menen janlı hawazda qosık atqarıwshılıǵı, jeti ǵáziyneniń biri bolǵan balıq, tábiyiy taza pal, ekologiyalıq taza miywe-palız hám baqsha ónimlerinen dám tatıwdı qáleseńiz, Sizdi Qanlıkólge mirát etemiz!

«90-jıllar muzeyi»

Muzeydegi eksponatlar, xalqımız tárepinen  ǵárezsizligimizden aldıńǵı hámde keyingi dáwirlerde paydalanılǵan elektro texnikalıq ásbaplardan 700 den aslam eksponatqa iye (televizor, kompyuter, kalkulyator, magnitofon, fotoapparatlar, audio hám video appaturalar, kassetalar, pul kupyuraları menen tiyinlar, telefonlar, avtoruchkalar h.t.b), sonday-aq, bul jerde «90-jıllar pochtası» xızmeti jolǵa qoyılǵan bolıp, Siz arnawlı «Qanlıkól» belgisi túsirilgen otkrıtkalarda jaqınlarıńızǵa xat jollawıńız múmkin.


Bul muzeyde tamashagóyler ushın balalıq, jaslıq  dáwirlerin eske alıw, jaslar ushın ǵárezsizligimizdiń dáslepki jıllarında paydalanılǵan elektro-texnika hám turmıslıq buyımlar menen tanısıw, ǵárezsizlik jıllarında júz bergen jańalanıw hám rawajlanıwlar menen salıstırıw imkaniyatı ayrıqsha tásir qaldıradı.

«Arba» etnokafesi

Bul etnokafe «Nawrız» awıl puqaralar jıyını aymaǵındaǵı A-380 «Guzor-Buxara-Nókis-Beyneu» avtomagistralı boyında jaylasqan.

Dem alıw orayında barlıq kolaylılıqlarǵa iye, qaraqalpaq, túrkmen, qazaq xalıqları milliy qara úyleri ham ózbek xalqınıń milliy tapchanlarında dem alıw ushın imkaniyatlar jaratılǵan. Sonday-aq, miymanlar ushın teatrlastırılǵan kishi tamashalar, janlı hawazda tuwısqan xalıqlardıń dástúriy hám zamanagóy qosıqları atqarılıp, sheber aspazlar tárepinen tuwısqan xalıqlar taǵamları hám basqada zamanagóy awqatlar tayarlanadı.


Bul jerdegi «Suvenirler dukansha»sında «Aral teńizi aymaǵı hawası» sıyaqlı hám taǵı basqada ózgeshe, qol miyneti menen tayarlanǵan hár qıylı suvenirlerdi estelik sıpatında satıp alıwıńız múmkin. 

«AlimSeyis» jılqıshılıqqa qániygelestirilgen fermer xojalıǵı 

Fermer  xojalıǵı usı jılda shólkemlestirilip, búgingi kúnde jámi 100 basqa jaqın jılqılar baǵılıp kelinbekte. Ata-babaları bir ásirden berli jıılqıshılıq penen shuǵıllanıp kiyatırǵan bul xojalıqta ingliz, qarabayır, axalteke sıyaqlı násildar 20 dan aslam atlar respublikamızdıń hám rayonlardın toyları hám at shabısı jarıslarında sıylı orınlardı iyelepkiyatırǵan ájayıp jılqıshı hám seyisler áwladı menen tanısıwıńız múmkin.


Házirgi kúnde jılqılar kóbeytilip, násil alıw hám de 5 ga maydanda miywe baǵın jaratıw, sonday-aq túyeshilikti rawajlandırıp, keleshekte xalqımızdı shubat hám qımız ónimleri menen támiyinlew jumısları ámelge asırılmaqta.
Bul orında miymanlarǵa qolaylı dem alıw orınları, qara uyler, milliy taǵamlar, tájiriybeli jol baslawshılar menen birgelikte jılqı minip, gózzal tabiyat qushaǵında sayaxat etip, doslarıńız benen gúlxan átirapında qosıqlar aytıp, dem alıw ushın imkaniyatlar jaratılǵan.

«Kitaplar esteligi» monumenti

Rayon orayında, «Baxıtlı» dem alıw parkinde Ózbekstan Respublikasında birden-bir bolǵan «Kitaplar esteligi» monumenti jaylasqan. Bul jerde hár kúni xalqımız hám jaslar kelip, kolaylı orınlıqlarda kitap oqıp, dem alıwı múmkin. Sonday-aq, xalqımız, ásirese oqıwshı hám abiturient jaslar arasında kitap oqıwǵa, bilim alıwǵa qızıǵıwshılıq artıp, keleshekke degen isenim arttıratuǵın orın  degen túsinikler qáliplespekte.

Jaqında jáne bir ózgeshe estelik boy tikledi. 
Estelik … «Bilimsiz hám erinshek insannıń jámiyettegi ornı» dep ataladı. Bunda, júzege kelgen azı-kem qıyınshılıqlar aldında bas iyip,  hesh qanday maqsetke umtılmaytuǵın, kitap oqımaytuǵın, miynet islewdi qálemeytuǵın, biypárwa insanlardıń xalqımız arasında hám jámiyetimizdegi «iyelegen» ornı sáwlelengen. Bunday insannıń ornı tek ǵana …«boslıq».


Bul ózgeshe estelik xalqımız, jaslarımız hám balalarımız arasında da úlken qızıǵıwshılıq oyatpaqta. Estelik ornatıwdan baslı maqset - xalqımızdı, ásirese jaslarımızdı kitap oqıwǵa, bilim alıwǵa, ómirde ushırasqan qıyınshılıqlardı márdana jeńip ótiwge, miynet etiw arqalı xalqımız arasında hám jámiyetimizde óziniń ılayıqlı ornın tabıwǵa umtılıw ushın ruwxlandırıwdan ibarat.

Pal hárreshiligi baǵdarı 

Rayon aymaǵında pal hárreshilikke qániygelestirilgen bir qanshafermer xojalıqları bolıp, bul jerde ózlerińiz hám perzentlerińiz benen birgelikte pal ónimlerin jetistiriw usılları,pal hárrelerin baǵıw, paldı jıynaw texnologiyaları menen tanısıw, insan den-sawlıǵı ushın oǵada paydalı bolǵan pal jetistiriwdi óz kózi menen kóriw hám tábiyiy taza pal ónimlerinen dám tatıw hám arzan bahalarda satıp alıwıńız múmkin. 

Sanaat kárxanaları baǵdarı

«Kanteksinvest» JShJ jip iyiriw fabrikasında qurılıs isleri menen búgingi kúnde 350 adam bánt. Keleshekte bul fabrikadan jılına 27-30 million AQSh dolları payda alıw rejelestirilgen. 


«Internationalconstructionmachinery» JShJ gúnjini qayta islep, gúnji mayın islep shıǵarıw hám eksportqa shıǵarıw menen shuǵıllanadı. 


Bul jerde ayına 400 tonna gúnji qabıl etilip, onnan 100 tonna gúnji mayın islep shıǵarıw hám keleshekte150 adamdı jumıs penen támiyinlew rejelestirilgen. 


Agroturizm baǵdarı 

Bul baǵdarda diyxanlarımız tárepinen awıl xojalıǵı ónimleri, perzentlerińiz ushın kúndelikli kiyim, nan, miywe-palız, baqsha hám basqada azıq-awqat ónimleri hám tutınıw tovarları ushın tiykarǵı shiyki zat -  paxta, biyday jetistiriw agrotexnologiyası menen óz kózińiz benen kórip tanısıw hám onda tikkeley qatnasıw eger, jazǵı dem alıs waqtında pisikshilik mapazında kelseńiz tábiyiy hám ekologiyalıq taza miywe-palız hám baqsha ónimlerinen dám tatıp, arzan bahalarda satıp alıwıńız múmkin.

Joqarıda atap ótilgen obektlerge ekotur shólkemlestiriledi.

Bársheńizdi Qanlıkólde miyman bolıwǵa mirát etemiz!!!

Baylanıs ushın telefonlar: +998907241787