«Jaslar-keleshegimiz» mámleketlik dástúri ámelde



Ózbekstan Respublikası Prezidentiniń 2018-jıl 27-iyun kúngi ««Jaslar-keleshegimiz» mámleketlik dástúri haqqında»ǵı PF-5466-sanlı Pármanı talaplarınıń orınlanıwı boyınsha respublikamızdıń barlıq orınlarında úgit-násiyat jumısların alıp barılıp, párman talaplarına muwapıq, aymaqlarda shtab dúzilip, óz jumısın baslamaqta.
Shtablardıń maqseti, jaslar isbilermenligin hár tárepleme qollap-quwatlaw, jaslardı biznes penen shuǵıllanıwı ushın qolaylı shárayatlar, jumıs orınlarınıń jaratılıwına, aymaqlarda jumıssız jaslar qatlamınıń bántligi támiyinleniwine qaratılǵan bolıp, investiciya hám sociallıq kompleksler, kommerciyalıq banklerdiń rayonlıq filialı, puqaralardıń ózin-ózi basqarıw organları menen birgelikte isbilermenlik jumısı menen shuǵıllanıw tilegindegi, bánt bolmaǵan jaslardı anıqlaw, jaslardıń pasportların qáliplestiriw, jaslardıń biznes baslamaları, start-ap, ideyalar hám joybarların islep shıǵıwda kerekli hújjetler hám materiallardı tayarlawda, rásmiylestiriwde, isbilermenlik jumısın shólkemlestiriwde jaslarǵa baylanıslı anıqlanǵan kemshilikleri saplastırılıp, isbilermenligin baslawda járdem beriw bolıp tabıladı. 
Qanlıkól rayon aymaǵında dúzilgen 4 sektor sheńberinde 11 isshi  toparı shólkemlestirilip, aymaqlarda úyme-úy júrip, orınlarda, shetki aymaqlarda ushırasıwlar ótkerilip, jaslardıń jumıssız hám pitkeriwshi jaslardıń múrájatları, bildirilgen usınısları tınlanbaqta.
Búgingi kúnde, isshi topar tárepinen 8116 shańaraqtan, sonıń 14-30 jas aralıǵındaǵı 12 816 jaslardıń (sonnan 5992 hayal-qızlar) pikir hám usınısları úyrenilip, túrli tarawlar boyınsha jámi 926 jas isbilermenligin baslaw ushın kredit alıwǵa qızıǵıwshılıǵın bildirgen jaslar anıqlandı.