27-июнь «Баспасөз ҳәм ғалаба хабар қураллары хызметкерлери күни»



 27-июнь күни Өзбекстан Республикасы бойлап Баспасөз ҳәм ғалаба хабар қураллары хызметкерлериниң кәсиплик байрамы кеңнен белгиленеди. Жәмийетте ашықлық, әшкаралықты тәмийинлеў, хабарларды оператив тәризде жеткерип бериў ҳәм ҳәр бир ҳәдийсеге қалыслық принциплери негизинде жантасыў-бул журналистлердиң кәсибине байланыслы тийкарғы өлшемлерден саналады. Əсиресе, раўажланыў ҳәм социал турмыслық ҳалатларды ҳалыққа, ғалабаға жеткериўде телевидение, радио, интернет, мәмлекет органлары ҳәм шөлкемлериниң баспасөз хызметлери, сондай-ақ, басылымлардың орны айрықша әҳмийетке ийе.

 Кеше Қанлыкөл районында бир қатар баспасөз ҳәм ғалаба хабар қураллары ҳәм мәлимлеме хызмети тараўында искерлик алып барып атырған хызметкерлер, тараўда узақ жыллар даўамында хызмет еткен мийнет ветеранларын Қанлыкөл районы ҳәкиминиң орынбасары Қ.Абдикаримов қутлықлады.

Соның менен бирге, Қарақалпақстан Республикасы Жоқарғы Кеңеси Баслығы М.Ерниязов ҳәм Министрлер Кеңеси баслығы Қ.Сариевлардың байрам қутлықлаўлары оқып еситтирилди.

 Усы орында айрықша атап өтиў орынлы, әсиресе район ҳәкими Д.Толыбаев, ғалаба хабар қураллары тараўы ўәкиллериниң жумысын ҳәмме ўақыт қәдирлеп, жоқары ҳүрмет пенен тилге алады. Өйткени, журналистлер ҳүкимет пенен халық арасындағы байланыстырыўшы «көпир» ўазыйпасын атқаратуғынлығын, өз баянатларында бир неше мәртебе келтирип өткен. Шынында да, соңғы жыллары мәлимлеме еркинлиги ҳәм социаллық тармақлардағы мәмлекетимиз имиджин еле де жоқары басқышларға көтеретуғын хабарларды жеткериўде, тараў ўәкиллериниң хызметлери айрықша болмақта.

Илаж бәрше карантин қағыйдаларына қатаң бойсынған ҳалда, онлайн тәризде Нөкис қаласы ҳәм бәрше районларда болып өтти. Илаж жуўмағында, тараў ўәкиллери, район ҳәкимлигиниң арнаўлы саўғалары менен сыйлықланды.

Байрамыңыз және бир мәрте мүбәрек болсын!

Қанлыкөл районы ҳәкимлиги Мәлимлеме хызмети