Баслаўыш тәлим-келешек тийкары



 Тәрбия-бул машаққатлы ҳәм тынымсыз мийнет. Тәрбияның инсан өмириндеги әҳмийети жүдә жоқары. Ол балаларды кәмилликке бағдарлайды. Ата-аналар болса, перзентлери келешекте кәмил инсан болып жетилискенин көрсе, өмиринде барлық арзыў-нийетлерине ерискендей шексиз қуўанышта болады. Келешек бүгинги мийнетлердиң, ертеңги зийнети. Биз ата-ана сыпатында, перзентлеримиз ҳешкимнен кем болмаған, наўқыран әўлад болып жетилисиўин қәлеймиз. Сол мақсетте, балаларды кишкенелигинен тәрбиялы ҳәм билимли инсанлар етип тәрбиялаў-баслаўыш тәлим қәнигелериниң баслы мақсети.

 Пүткил дүнья жүзи коронавирус инфекциясына қарсы гүресип атырған бир пайытта, устазлар да қолынан келгенинше, социаллық тармақлар арқалы, билим сырларын оқыўшы жасларға жеткермекте. Оқыўшылар устазлары менен биргеликте, онлайн сабақлар, онлайн дөгереклер өткерип, көнликпелерин еле де беккемлеп бармакта. Дүнья еллерин жаўлап үлгерген қәўипли инфекция изге шегинип, бул күнлер де өтеди. Буның ушын ҳәр бир пуқара, талапларға, қағыйдаларға ҳәм тәртипке қатаң бойсынып барыўы зәрүр. Əлбетте, бул жолда бәршеден терең сабырлылық талап етиледи.

 «Ҳәр исте, бир жақсылық бар»-дегениндей, пандемия шараятында, инсанлар бир-бири менен бирге болмакта, перзентлер ата-ана менен сабақ таярлаўдың заўқын сезбекте, айлап көрмейтуғын жақынларымыз жанымызда. Бундай мысалларды еле де дизе бериўимиз мүмкин.

 Сонлықтан, бул сынақтың да мағанасы, инсан басына келген қыйыншылықлар арқалы, өзиниң руўхый ҳалатын беккемлеп барады. Ал, жаслар болса, бундай жағдайда, бос ўақытларының мол екенлигинен пайдаланып, түрли пайдалы ислер менен бәнт болғаны дурыс. Бул сәт, өнер ийелеў, тил үйрениў, китап оқыў ушын әйне қолайлы ўақыт саналады. Сол ушын, жаслар зымырап өтип баратырған ўақыттан нәтийжели ҳәмде мақсетли пайдаланыўға тырысың!  

Артықгүл Ырзаева,

Қанлыкөл районы ХББ қараслы 18-санлы улыўма

билим бериў мектебиниң баслаўыш класс муғаллими.