“Арзанластырылған үй-жайдың басланғыш төлеми ушын төлеп берилген 31 млн сўм қай жерге кетти?” Буған министрлик төмендегише жуўап береди:



 Пуқара Муратбай Аралбаев тәрепинен социаллық тармақлар арқалы жәрияланған видеокөриниске Қарақалпақстан Республикасы Мәҳәлле ҳәм шаңарақты қоллап-қуўатлаў министрлигиниң мәлимлеме хызмети төмендегише жуўап береди:

Усы видеокөринисте Қанлыкөл районындағы “Дослық” МПЖ аймағында жасаўшы, 1962-жылда туўылған, 2-топар майыбы Қалбаева Серегул Базарбаевнаға арзанластырылған үй-жайдың басланғыш төлеми ушын төлеп берилген 31 млн сўм қай жерге кетти, деген сораў пайда болғаны сәўлеленген.

Өзбекстан Республикасы Министрлер Кабинетиниң 285-санлы қарары бойынша 2018-жылда Қанлыкөл районындағы үй-жайға мүтәж, аўыр социаллық аўҳалға түсип қалған 10 ҳаял-қыздың ҳәр бирине үй-жайларының басланғыш төлеми ушын 31 686 725 сўм, жәми 316 867 250 мың сўм муғдарында “Ҳаял-қызларды  ҳәм шаңарақты қоллап-қуўатлаў жәмийетлик фонды” есабынан төлеп берилди.

Бирақ, 2018-жыл август айында районда арзан үй-жай қурылысы нәзерде тутылмағанлығы есапқа алынып, оларға үй-жай алып бериў имканы болмады. 2019-жылда да районда көп қабатлы арзанластырылған үй-жайлар қурылысы әмелге асырылмады. Тек ғана 2 сотихлы 10 үй-жайлар қурылысы әмелге асырылыўы себепли, 2018-жылда басланғыш төлеми төлеп берилген ҳаял-қызларға усы үй-жайдан алып берилиўи жобаластырылды.

Район комиссиясы тәрепинен үй-жайлардың кейинги кредит тийкарында берилетуғын бөлимин төлеў шараяты бар яки жоқ екенлиги қайта көрип шығылды. Үйрениў барысында, 6 ҳаял-қыз, соннан Серегул Қалбаева да 2 сотихлы үйдиң кейинги кредит төлемин төлеў имканиятының жоқлығы себепли, бул үй-жайды ала алмайтуғынлығын мәлим етти.

Нәтийжеде комиссия жуўмағы менен 2019-жыл 3-апрель күни район ҳәкиминиң үй-жайларға мүтәжлердиң тастыйықланған дизимине өзгерис киритиў ҳаққындағы мәжилис баянламасы тастыйықланды.

Бунда 2018-жылда 6 ҳаял-қыздың, соннан, Серегул Қалбаеваның есабына түскен 31 686 725 сўм қаржы кейинги үй-жайға мүтәжлер есабына өткерип берилди.

Қарақалпақстан Республикасы Мәҳәлле ҳәм шаңарақты қоллап-қуўатлаў министрлигиниң мәлимлеме хызмети