Санаторияларда даўаланыў ушын жолланбалар мәмлекетлик хызметлер орайлары арқалы берилиўи мүмкин



 Кекселер ҳәм нәгиранлығы болған шахсларға санаторияларда даўаланыў ушын жолланбалар мәмлекетлик хызметлер орайлары арқалы берилиўи мүмкин. Бул ҳаққындағы ҳүкимет қарары жойбары жәмийетшилик додаланыўына қойылған.

“Министрлер Кабинетиниң “Кекселер ҳәм нәгиранлығы болған шахсларға санаторияларда даўаланыў ушын жолланбалар бериў бойынша мәмлекетлик хызметлерди көрсетиўдиң ҳәкимшилик регламентин тастыйықлаў ҳаққында”ғы қарары жойбары норматив-ҳуқықый ҳүжжетлер жойбарлары додаланыўы ушын порталға жайластырылды.

Жойбарға көре, 2020-жыл 1-сентябрьден баслап усы қарар менен тастыйықланған ҳәкимшилик регламентке муўапық көрсетилетуғын мәмлекетлик хызметлерден пайдаланыў ушын физикалық шахслар тек ғана МХОларға ямаса бирден-бир интерактив мәмлекетлик хызметлер порталына мүрәжат етеди.

Кекселер ҳәм нәгиранлығы болған шахслар өзлери ямаса ўәкиллери келип мүрәжат еткен жағдайда, Мәмлекетлик хызметлер орайы хызметкери кекселер ҳәм нәгиранлығы болған шахслар атынан, портал арқалы мүрәжат еткен жағдайда болса еркин түрде сораўнаманы электрон түрде толтырады.

Жойбарға көре, жолланбаларды бериў даўамлылығы төмендегилерден ибарат болады:

- урыс нәгиранлығына теңлестирилген шахсларға;

- республика әҳмийетине ийе шахсый пенсия алыўшы шахсларға;

- Чернобиль АЭС апатшылығы ақыбетинде нурланыў кеселлигине шалынған ҳәм оны басынан кеширген шахслар, сондай-ақ, Чернобиль апатшылығы себепли нәгиран болып қалған шахсларға;

-ядро полигонлары ҳәм басқа радиация-ядро объектлеринде әскерий хызметти өтеген пенсия жасындағы шахсларға;

- өзгелер күтимине мүтәж болған жалғыз кекселерге;

- еки жылда бир рет – нәўбет тийкарында;

- урыс қатнасыўшыларына теңлестирилген шахсларға;

- қайтыс болған әскерий хызметкерлердиң жаңа некеден өтпеген жалғыз ҳаялларға (жалғыз ерлерге);

- I ҳәм II-топар нәгиранлығы, көзи әззи I-топар нәгиранын бақлап барыўшы шахсқа;

- пуқаралар жыйынлары ҳәмде Өзбекстан Республикасы Мәҳәлле ҳәм шаңарақты қоллап-қуўатлаў министрлиги тәрепинен берилген усыныснамаға ийе болған актив кекселер.

Актив кекселер ушын санаторияларға жолланбалар алыў мақсетинде усыныснамалар бериў тәртиби Мәҳәлле ҳәм шаңарақты қоллап-қуўатлаў министрлиги тәрепинен белгиленеди.

Үш жылда бир рет – нәўбет тийкарында:

- жасқа байланыслы пенсия ҳәм социяллық напақа алыўшыларға, сондай-ақ, улыўма пенсия жасына жеткен бағыўшысын жоғалтқанлық пенсиясы алыўшыларға.

Еслетип өтемиз, жойбар додаланыўы 22-июльға шекем даўам етеди.

Қанлыкөл районы Мәмлекетлик хызметлер орайы