Исбилерменлер менен ушырасыў ɵткерилди



 Бүгин Қанлыкɵл районы ҳəкимлиги мəжилислер залында, районда искерлик алып барып атырған исбилерменлердиң машқалаларын тыңлаў ҳəм оларды унамлы шешиў мақсетинде, ушырасыў шɵлкемлестирилди.

 Ушырасыўға Қарақалпақстан Республикасы Министрлер Кеңеси баслығының биринши орынбасары А.Тəжетдинов, Өзбекстан Республикасы Президенти жанындағы Исбилерменлик субъектлериниң ҳуқықлары ҳəм нызамлы мəплерин қорғаў бойынша ўəкил аппаратының бас инспекторы  Б.Дəўлетияров, район ҳəкими А.Ибрагимов, Қарақалпақстан Республикасындағы Өзбекстан Республикасы Бас министриниң исбилерменлер мүрəжатларын кɵрип шығыў қабыллаўханасы баслығы Р.Айтмуратов, басқарма баслықлары, райондағы мəкеме, кəрхана, шɵлкем ўəкиллери ҳəмде исбилерменлер қатнасты.

 Ушырасыў барысында, 20ға жақын мəселелер бойынша мүрəжатлар келип түсти. Әсиресе, банк кредитин алыў даўамындағы сергизданлықлар, исбилерменлик жумысын баслаў ушын жер орын ажыратыў ҳəмде пандемия шəраятында искерлигин тоқтатқан кəрханаларды қайта иске қосыў бойынша мəселелер қаралды. Усы шеңберде кɵрип шығылған мүрəжатлардың дерлик 80 пайызы унамлы шешим табатуғын болды. Айрымлары терең үйренип шығыўды талап еткенлиги себепли белгили мүддет берилип, бақлаўға алынды.