«Ҳәрекетлер стратегиясын жасларымыз билиўи керек» жойбары Қанлыкөлде



Өзбекстан Республикасы Олий Мәжилиси жанындағы мәмлекетлик емес, коммерциялық емес шөлкемлерди ҳәм пуқаралық жәмийетиниң басқада институтларын қоллап-қуўатлаў жәмийетлик фонды тәрепинен ислеп шығылған «Ҳәрекетлер стратегиясын жасларымыз билиўи керек» жойбарын жаслар арасында ен жайдырыў ҳәмде ҳәрекетлер стратегиясы талаплары бойынша үгит-нәсиятлаў топары Қанлыкөл районы улыўма билим бериў мектеплери ҳәм колледж оқыўшы жаслары менен сәўбетлесиў өткерди.

Сәўбетлесиў барысында, «Илим ҳәм жәмийет» журналының жуўаплы хаткери Д.Догарованың «Ҳәрекетлер стратегиясын жасларымыз билиўи керек» жойбары, «Миллий идея, руўхыйлық тийкарлары ҳәм ҳуқық тәлими» кафедрасының доценти Т.Қудайбергенованың «Ҳәрекетлер стратегиясының әҳмийети ҳәм жаслар турмысындағы роли», «Миллий идея, руўҳыйлык тийкарлары ҳәм ҳуқық тәлими» кафедрасының ассисент оқытыўшысы Ш.Тажимовтың «Ҳәрекетлер стратегиясының әҳмийети ҳәм оның тийкарғы бағдарлары», «Нөкис пединституты» газетасының жуўаплы хаткери, Қарақалпақстан Жазыўшылар аўқамының поэзия Кеңеси баслығы А.Қайповтың «Ҳәрекетлер стратегиясы – Ўатанымыздың раўажланыўындағы әҳмийети» ҳаққындағы баянатлары тыңланды.

Баянатларда, Өзбекстан Республикасы Президентиниң «2017-2021-жылларда Өзбекстан Республикасын раўажландырыўдың бес үстин бағдары» бойынша  2017-жыл 7-февральдағы ПФ-4947-санлы «Өзбекстан Республикасын еледе раўажландырыў бойынша Ҳәрекетлер стратегиясы ҳаққында»ғы пәрманының қабыл етилиўи, пәрмандағы бес әҳмийетли бағдар: 1. Мәмлекетлик ҳәм жәмийетлик қурылысты жетилистириў, 2. Нызам үстинлигин тәмийинлеў ҳәм суд ҳуқық системасын  реформалаў, 3. Экономиканы еледе раўажландырыў ҳәм либералластырыў, 4. Социаллық саланы раўажландырыў, 5. Қәўипсизликти, миллетлер арасында татыўлықты ҳәм диний кеңпейилликти тәмийинлеў, терең ойланған өз-ара пайдалы ҳәм әмелий руўхтағы сыртқы сиясатты жүргизиў ҳаққында бағдарлары ҳәмде  2017-2021-жылларға мөлшерленген стратегиядан көзленген мақсети, мәмлекетимизде алып барылып атырған раўажланыўлар нәтийжесин жәнеде асырыў, мәмлекет ҳәм жәмийет раўажланыўын жаңа басқышқа көтериў, турмыстың барлық тараўларын либералластырыў, мәмлекетимизди модернизация қылыў бойынша белгиленген бағдарларды әмелге асырыў ҳаққында пикирлер айтылды.

Сондай-ақ, «Ҳәрекетлер стратегиясын жасларымыз билиўи керек» жойбарының белгиленген мақсет ҳәм ўазыйпаларын жаслар арасында ен жайдырыў ҳәмде ҳәрекетлер стратегиясы талаплары бойынша үгит-нәсиятлаўдағы тийкарғы мақсети, келешегимиз болған жасларды руўҳый әдеп-икрамлы болыў ҳәм баркамал әўлад етип тәрбиялаў ислеринде, олардың өмирге мүнәсип орын ийелеўде кең имканиятлар жаратыў, олардың ҳуқықый билимин ҳәм ҳуқықый мәдениятын раўажландырыўға қаратылған бағдарларына тоқталып, жасларды биргеликте ҳәрекет етиўге қылыўға шақырды.