Бақша тәрбияланыўшылары сейилге шықты



1-июнь Халықаралық балаларды қорғаў күни алдынан республикамыз бойлап, байрамға арналған түрли мазмундағы илажлар өткерилмекте, усындай илажлар шеңберинде, Қанлыкөл районлық Мектепке шекемги билимлендириў бөлимине қараслы 8-санлы мектепке шекемги билимлендириў мекемесиниң тастыйықланған режесине муўапық, районымыздың белгили мәдений орынларына саяхат шөлкемлестирилди.

Саяхат шеңберинде, үлкен топар тәрбияшысы Жуманазарова Набираның басламасы менен үлкен топар тәрбияланыўшылары қатнасында, бақшадан  «Қанлыкөл» посёлка пуқаралар жыйыны аймағындағы «90-жыллар  мүзейи»не шекемги аралықта сейил өткерилип, сейил даўамында, жол ҳәрекети бойынша бағшада алған билимлерин, үлкен жол бойында жолдан өтиўде жол ҳәрекети қәделерин қалай сақлаў керек, қандай жағдайда жолдан өтиў, тоқтаў, таярланыў ҳаққындағы түсиниклерин әмелде көрсетип барылды.

«90-жыллар мүзейи»ниң ашылғанына аз ўақыт болсада тамашагөйлери  көбеймекте. Бақша тәрбияланыўшылары мүзей гиди тәрепинен күтип алынып, мүзейден орын алған экспонатлар электро техникалық әсбаплар менен таныстырып өтти.

 «Балалы үйдиң урлығы жатпас» дегендей мынаў телевизор бизиң үйде бар, анандай телефонлар бар, мынандай видео двдлар ажағамның үйинде, кишкене болсада балалардың ақ көкиреги менен айтылып атырған сөзлер мүзей тамашагөйлериниң ҳәр бириниң қыялынан өткени анық, себеби, бақша балаларыда көрген нәрсеси көзине ыссы көринип, көргенин айтып атыр.

«90-жыллар мүзейи»н тамашалап, қызықлы ҳәм мазмунлы мағлыўматлар алып, шығып баратырған бақша балалары жазыўды үйренип анама хат жазаман, почтаңызда хат таўсылып қалмасын алып қойың,-деп айтып кетти. Әне - бала деген жарықлық.