Ҳеш ким меҳир, итибардан шетте қалмайды



Республикамыздың барлық орынларында 1-июнь «Халықаралық балаларды қорғаў күни» байрам мүнәсибети менен «Хәр бир балаға меҳир, итибар» сүрени менен балалар қатнасында түрли мазмундағы ҳәптелик илажлар, концерт дәстүрлери, көргизбелер, спорт жарыслары ҳәмде кем тәмийинленген шаңарақ балалары менен үй шәраятында тәрбияланып атырған майыплылығы бар балалардың жағдайынан хабар алынып, байрам қуўанышларын бөлиспекте.

Усындай илажлар шеңберинде, Қанлыкөл районында район ҳәкимлиги, районлық медицина бирлеспеси менен тийисли мекемелер басшылары қатнасында байрам мүнәсибети менен майыплылығы бар болған «Қанлыкөл» посёлка пуқаралар жыйынында жасаўшы Б.Алламбергенова менен «Арзымбетқум» аўыл пуқаралар жыйынында жасаўшы М.Мадияровлардың социаллық жағдайларынан хабар алып, байрам саўғалары менен майыплар арбалары тапсырылды.

Сондай-ақ, Өзбекстан Жаслар аўқамының районлық Кеңеси тәрепинен район аймағындағы майыплылығы бар болған жас өспиримлер «Бескөпир» аўыл пуқаралар жыйынында жасаўшы Р.Нуратдинов пенен «Дослық» мәкан пуқаралар жыйынында жасаўшы М.Муяддиновалардың үйлерине барып, аўҳалынан хабар алынып, майыплар арбалары саўға етилди.

Буннан тысқары, үй шәраятында тәрбияланып атырған имканияты шекленген 10 жас өспиримлердиң үйлерине  барып, аўҳалларынан хабар алынды. Балаларды байрам менен қутлықлап, әдебий китаплар менен саўғалар берилди.