Қанлыкөлде оқыў әмелий семинары шөлкемлестирилди



Қарақалпақстан  Республикасы Жоқарғы Кеңеси Президиумының 2018-жыл 15-майдағы «Оқыў әмелий семинарларын шөлкемлестириў ҳаққында»ғы 331-санлы қарарына муўапық, белгиленген кесте тийкарында, Қарақалпақстан Республикасы район ҳам қала ҳәкимлериниң орынбасарлары, ҳәкимлик қәнигелери, тийисли мәмлекетлик ҳәм жәмийетлик шөлкемлер басшылары қатнасында 2018-жыл 7-июнь күни Қанлыкөл Санаат-транспорт кәсип-өнер колледжинде оқыў әмелий семинарын баслады.

7-9-июнь күнлери аралығында даўам ететуғын оқыў семинары мақсети тийкарынан, жергиликли атқарыў ҳәкимиятлары тәрепинен мәмлекетимиздиң барлық тараўларында әмелге асырылып атырған раўажланыўлардың нәтийжели ҳәм системалы орынланыўын тәмийинлеў, халықтың турмыс дәрежесин жақсылаў барысында район ҳәкими орынбасарларының  кәсиплик шеберликлери, жуўапкершилигин асырыў ҳәмде белгиленген ўазыйпаларды әмелге асырыўға қаратылған.

Оқыў әмелий семинарлары, Өзбекстан Республикасы Президенти ҳәм Ҳүкиметимиз тәрепинен қабыл етилген Пәрман ҳәм Қарарлардың орынланыўы, ҳәкимият системасы, бойсыныўшы районлық мекеме, кәрханаларда жумысты функционал шөлкемлестириўде машқалалар, жергиликли басқарыў аппараты қәнигелериниң қәбийлети, жумыс сыпатын асырыў ис-илажлары, районды раўажландырыўға байланыслы социаллық ҳәм экономикалық мәселелер бойынша ашық сәўбетлесиўлер, анықланған машқалалардың шешими бойынша интерактив усылда әмелий шынығыўлар өткериў, үйренилип атырған тараўды раўажландырыўдың «Жол картасы»н ислеп шығып, оның орынланыў механизми ҳәм мониторинги сондай-ақ, өтилген темалар бойынша район ҳәкими орынбасарларының функционал ўазыйпалары негизинде «Жол картасы»н орынлаў бойынша ис-режесин ислеп шығыўға арналған.