«Kanteks invest»  неше долларлық өнимди экспортқа жиберген?



2019-жылы март айында иске түскен Қанлыкөл районындағы  «Kanteks Invest» жуўапкершилиги шекленген жәмийети райондағы еӊ ири өндирис кәрханасы болып табылады.

Бүгинги күни 600 ден аслам жаслар жумыс ислеп атырған бул кәрхана  соӊғы ўақытлары аймақ халқын турақлы жумыс орынлары менен тәмийинлеп қоймастан, ал, өз өнимлерин сырт еллерге шығарып, жылдан-жылға экспорт көлемин көбейтип келмекте.

-Кәрханамыз жылына 11 мыӊ тонна пахтаны қайта ислеў имканиятына ийе,-дейди жәмийет директоры Қуўандық Ешмуратов.-2019-жылы 8,4 млн доллар, 2020-жылы 10,8 млн долларлық ийирилген жипти сырт еллерге экспорт еткен болсақ, 2021-жылдыӊ биринши шерегинде 4,2 млн долларлық өнимлеримизди экспортқа жибердик. Бунда тийкарынан Түркия, Россия, Украина ҳәм Польша мәмлекетлериндеги шериклер менен бирге ислесип атырмыз. Сондай-ақ, Өзбекстанныӊ ишки базарына да өткен дәўир ишинде 133,1 млрд сумлық өнимлерди сатып, кәрханамыздыӊ саўда айланысын көлемин кеӊейтип атырмыз. Жыл ақырына шекем өндириске  және де пәт ендирип, кәрханамыздыӊ экспортын көлемин көбейтиўди мақсет еткенбиз.

Бүгинги күни жәмийетте  3 сменада жумыслар  жүргизилмекте. Жумысшылардыӊ өнимли жумыс ислеўи ушын кәрханада барлық қолайлы шараятлар жаратылып берилип, олардыӊ  мийнет ҳақылары өз ўақтында берилип келинбекте. Сондай-ақ, кәрхана тәрепинен хызметкерлердиӊ жумысқа келип-кетиўи  ушын арнаўлы автотранспортлар ажыратылған. Бул болса, жәмийетте ис өниминиӊ еле де артыўында әҳмийетли орын тутпақта.

Адилбай Оразов,

Қарақалпақстан хабар агентлиги.