Бир-бирине ийинлес ҳәм мәдаткар исбилерменлер



Халқымызда «қоӊсы-қоӊсыдан тәлим алады»-деген әжайып мақал бар. Әсирлер даўамында өзиниӊ қунын жойтпай киятырған бул сөз бүгинги күни де өз тастыйығын таўып келмекте.

Қанлыкөл районы  «Қосжап» аўыл пуқаралар жыйыны турғыны Тазагүл Төремуратова бурынғы «Сарыалтын» хожалығыныӊ кеӊсесин сатып алып, «Қанлыкөл-Тазагүл» шаӊарақлық кәрханасын ашқан 2015-жылы бул аймақта өндирис пенен шуғылланатуғын бирде-бир цех болмаған.

-Еӊ дәслеп жумысымызды азық-аўқатлық затларды сатыў дүкәны, жәмийетлик аўқатланыў орны ҳәм тигиўшилик цехын ашыў менен баслаған болсам, соӊынан  нанбайхананы иске түсирдим,-дейди кәрхана баслығы Тазагүл Төремуратова.-Буннан соӊғы жыллары автосервис, сүтти қайта ислеўши цех ҳәм «Санаатқурылыс банк»тиӊ 1 млрд 590 млн сумлық жеӊиллетилген кредити есабынан еки қабатлы, барлық қолайлылықларға ийе «Нәўше» мәмлекетлик емес мектепке шекемги билимлендириў шөлкемин ашып, аўылымыз халқыныӊ аўырын жеӊиллетиў жолында аянбастан хызмет етип атырмыз.

Ҳақыйқатында да искер ҳәм шебер шөлкемлестириўши исбилермен Тазагүл Төремуратова атап өткениндей, бүгинги күни тигиўшилик цехы, нанбайхана, «Таза милк» маркасы менен ислеп шығарылып атырған сүтти қайта ислеў орны, балалар бақшасы, асхана, дүкән ҳәм автосервислерде жумыслар қызғын алып барылмақта.

-Тазагүл апаныӊ тигиўшилик цехында бир-неше жыл жумыс иследим,-дейди бизге усы аймақ турғыны Қалжан Балтабекова.-Өткен 2020-жылы район ҳәкимлигине тигиўшилик        цехын қурмақшы екенлигимди ҳәм соған жер орнын ажыратып бериўди сорап мүрәжат еткен едим. Мениӊ бул мүрәжатым өз ўақтында инабатқа алынып, қурылыс ушын жер орны ажыратып берилди. Быйыл усы цехты иске түсирдим ҳәм  2 жасты қасыма шәкиртликке алып, оларға тигиў ҳәм пишиў сырларын үйретип атырман.

Сондай-ақ, усы жыйын турғыны Санавар Жуманиязова да Тазагүл Төремуратованыӊ цехында еки жыл жумыс ислеп, «Халық банк»иниӊ 8 млн сумлық жеӊиллетилген кредити есабынан тигиўшилик цехына керекли үскенелерди сатып алып, өз үйинде тигиўшилик цехын ашып иске түсирген.

Жуўмақлап айтқанда бизлер барлық аўылласлар бири-бирине өрнек болып, жумыс ислесе жәмийетимиз және де раўажланады, деп ойлаймыз.

Адилбай Оразов,

Қарақалпақстан хабар агентлиги.