Қ.Қуронбоев, ушырасыўда жаслардың мүрәжатларын тыңлады



Өзбекстан Республикасы Президентиниң 2018-жыл 27-июнь күнги ««Жаслар-келешегимиз» мәмлекетлик дәстүри ҳаққында»ғы ПФ-5466-санлы Пәрманы талапларының орынланыўы бойынша республикамыздың барлық орынларында үгит-нәсият жумысларын алып барыў бойынша шөлкемлестирилген исши топары Қанлыкөл районында ушырасыў өткерди.

Ушырасыўда, Өзбекстан Республикасы Президенти мәмлекетлик мәсләҳәтшиси, Өзбекстан Жаслар аўқамы Орайлық Кеңеси баслығы Қ.Қуронбаев, Қарақалпақстан Республикасы Жоқарғы Кеңеси Баслығының орынбасары А.Ҳамраев, Қарақалпақстан Республика прокуроры Р.Раҳматовлар қатнасты.

Ушырасыўдың мақсети, заманагөй билим ҳәм көнликпелерге ийе, мәмлекеттиң мүнәсип келешеги ушын жуўапкершиликти сезетуғын жетик, мақсетине умтылыўшаң ҳәм ғайратлы жасларды тәрбиялаў мәмлекетти турақлы ҳәм еледе раўажландырыўдың ең әҳмийетли шәрти болып, соңғы жылларда жаслардың интеллектуал ҳәм дөретиўшилик қәбилетин жүзеге шығарыў, жаслардың социаллық – экономикалық белсендилигин асырыў, олардың пуқаралық жуўапкерлигин арттырыў бойынша жумысларды әмелге асырыўдан ибарат.

Сонлықтан  жаслар исбилерменлигин комплекс раўажландырыў ҳәм жасларды исбилерменлик пенен шуғылланыўға қамтыў ушын жас исбилерменлердиң келешек идеялары ҳәм жойбарларын жүзеге шығарыўда мақсетли дәстүрлер режелерин дүзиўде саўатқанлығын асырыў, оларға бизнесин шөлкемлестириў, алып барыў көнликпелерин сиңдириў, «Жаслар-келешегимиз» мәмлекетлик дәстүри бойынша «Жас исбилерменлер» орайларында оқытыў ҳәмде «Жаслар мийнет гузары» комплекслери шөлкемлестирилип, онда жаслар исбилерменлигин қоллап-қуўатлаў, бизнес пенен шуғылланыўы ушын имканиятлар, исбилерменликлер негизинде жаңа жумыс орынлары жаратылып, жаслардың бәнтлигин тәмийинлеўге қаратылған.

Сондай-ақ, 14-30 жас аралығындағы жаслар исбилерменлигин баслаў, кеңейтиў ҳәмде келешек идеялары жойбарларының мақсетли дүстүрлери тийкарында ислеп шығылған бизнес режелери тастыйықланып, коммерциялық банклердиң районлық филиалында «Жаслар келешегимиз» жамғармасы есабынан жеңиллетилген жыллық 7% лик кредитиниң берилиў тәртибине тоқталды.

Ушырасыў даўамында, Қанлыкөл районы жас исбилерменлери «Бостан» аўыл пуқаралар жыйынынан Қ.Қулмуратов аймақтағы моншаны иске қосыў ушын 300 млн. сўм, «Дослық» мәкан пуқаралар жыйынынан  С.Сабырбаева кондитер өнимлерин ислеп шығарыў ушын 200 млн. сўм муғдарында кредит алыў бойынша билдирилген усыныслары тийкарында, сол ўақыттың өзинде тийисли ҳүжжетлер таярланыўы белгиленди.