Қанлыкөл районында мекемелераралық муўапықластырыўшы кеңес мәжилиси болып өтти



Қанлыкөл районлық ҳуқық қорғаў органлары муўапықластырыўшы кеңес мәжилиси болып өтти.

Мәжилисте, Қарақалпақстан Республикасы прокуратурасы бөлим баслығы Б.Машарипов, район ҳәкими М.И.Қосназаров ҳәмде ҳуқық қорғаў уйымлары хызметкерлери, профилактика инспекторлары менен пуқаралардың өзин-өзи басқарыў уйымлары, мекеме, кәрхана ҳәм шөлкемлер басшылары қатнасты.

Муўапықластырыўшы кеңес мәжилисинде, Қанлыкөл районы аймағында нызамлылықты беккемлеў, пуқаралардың ҳуқық ҳәм еркинликлерин қорғаў, жынаятшылық ҳәм ҳуқықбузарлықлардың алдын алыў бойынша 2018-жыл 6 айы даўамында әмелге асырылған жумыслары ҳәмде алдағы ўазыйпалар ҳаққында мәселе қарап шығылды.

Мәжилисте район прокуроры А.Каримбаевтың күн тәртибиндеги мәселе бойынша мәлимлемесинде, прокуратура уйымлары алдына қойылған ўазыйпаларды орынлаў барысында өткерилген 20 ға жақын тексериўлер нәтийжесинде 56 прокурорлық бақлаў ҳүжжетлери қолланылып, 163 пуқараның бузылған ҳуқықлары тикленген. Соның менен бирге, нызам ҳәм пәрманларды үгит-нәсиятлаў, жынаятлар ҳәм хуқықбузарлықлардың алдын алыў бойынша 90 илажлар өткерилгенлиги айтылды.

2018-жылдың 6 айы (2017-жылдың 6 айы менен салыстырмалы түрде) даўамында пуқаралар ҳәм юридик шахслардан улыўма 41 (28) муражатлар келип түскен. Соннан физикалық пуқаралар ҳәм юридик шахслардың 26 (15) мүрәжатларының шешими таўылып, 13 (10) арза қанаатландырылған, 13(5) пуқара ҳәм юридикалық шахсларға мүрәжатлары бойынша ҳуқықый түсиниклер берилген, 8(10) мүрәжат тексериў материалларына қосылып шешилген болса 15(9) мүрәжат тийисли тараў органларына жиберилип,  20 (15) физикалық ҳәм юридикалық шахслардың ҳуқықлары тикленгени ҳаққында айтып өтилди.

Сондай-ақ, протест келтириў жолы менен 21 нызамсыз ҳүжжетлер нызамға муўапықластырылған, анықланған нызам бузыў жағдайларын сапластырыў бойынша тийисли мекемелерге 8 усыныс киритилген, 22 пуқара интизамий, 18 пуқара ҳәкимшилик жуўапкершиликке тартылған.

Мәжилис даўамында күн тәртибиндеги мәселелер бойынша районлық ишки ислер бөлими баслығы Қ.Қабулов, мәмлекетлик салық инспекциясы районлық бөлими баслығы Т.Туреев, районлық медицина бирлеспеси баслығы А.Асқаров, районлық санитария эпидемиология бақлаў орайы баслығы Г.Нурымбетова, районлық халық билимлендириў бөлими баслығы Т.Қрықбаевлар өз жумыслары бойынша пикир ҳәм усынысларын билдирип өтти.

Мәжилисте нызамшылық ҳәм жынаятшылыққа қарсы гүресиў аўҳалын жақсылаў бойынша Өзбекстан Республикасы Президенти пәрман ҳәм қарарларының орынланыўына итибар қаратылып, тийисли ўазыйпалар белгиленип алынды.