Автомобильде жолаўшы тасыўды тәртипке салыў әпиўайыластырылды



 2021-жыл 7-май күни ПҚ-5108-санлы “Автомобиль транспортында жолаўшылар тасыў искерлигин тәртипке салыўды және де әпиўайыластырыў ис-иләжлары ҳаққында”ғы Президент қарары қабыл етилди. Қабыл етилген қарарға муўапық, 2021-жыл 15-майдан 2022-жыл ақырына шекем автомобильде жолаўшы тасыў искерлигин тәртипке салыўды әпиўайыластырыў бойынша эксперимент өткериледи. Бунда:

 - жолаўшыларды айдаўшыдан тысқары төрттен артық болмаған орынларға ийе болған жеңил автотранспортларда тасыў жеке тәртиптеги исбилерменлер шуғалланыўы мүмкин болған искерлик түрлери дизимине киритиледи.

 Жеке тәртиптеги исбилерменлер тәрепинен жолаўшыларды жеңил автотранспортларда тасыў лицензия қағазына тийкар әмелге асырылады. Лицензия қағазы 21 жасқа толған ҳәм басқарыўында арзаны бериў ўақтында 10 жылдан артық болмаған ўақыт даўамында эксплуатация қылынып атырған автомобиль бар болған жеке тәртиптеги исбилерменлерге “Лицензия” мəлимлеме системасы арқалы бериледи.

 Автомобильде жолаўшыларды тасыў менен шуғылланатуғын жеке тәртиптеги исбилерменлер “Аккредитация орайы” МУКда аккредитациядан өткен техникалық хызмет көрсетиў станцияларында 6 айда кеминде 1 рет транспорт қуралын техникалық тексериўден өткериў шәрт. Жеке тәртиптеги тасыўшыларға жолаўшыларды автомобиль транспортында тасыў искерлиги шеңберинде хызметкерлерди жумысқа жаллаўға рухсат етилмейди; 2021-жыл 1-сентябрге шекем жеке тәртиптеги тасыўшыларды мәмлекетлик дизимнен өткериў ушын мәмлекетлик бажы өндирилмейди.

 Жеке тәртиптеги тасыўшылардан лицензия қағазы берилгенлиги ушын мәмлекетлик бажы жылына БЕМның бир есеси муғдарында өндириледи. Бунда мәмлекетлик хызметлерди көрсеткенлиги ушын жыйым өндирилмейди. Жеке тәртиптеги тасыўшылар қатаң белгиленген муғдарда физикалық шахслардан алынатуғын дәрәмат салығын 3 тоннаға шекем жүк көтериў имканиятына ийе автомобиль транспортында жүклерди тасыў искерлиги менен шуғылланыўшы жеке тәртиптеги исбилерменлер ушын белгиленген ставкада төлейди.

Д.Қуденов,

Қанлыкөл районы МХО бөлим баслығы.