RESPUBLIKAMÍZDA XALÍQTÍ DIZIMGE ALÍW ILAJIN ÓTKERIW BIZGE NE BEREDI?



        

 Hár qanday mámlekettiń tariyxı – bul, birinshi náwbette, onda jasaytuǵın xalıqtıń tariyxı, xalqınıń sanı hám quramı, onıń ekonomikalıq hám sociallıq xarakterlerinde óz ańlatpasın tabadı. Xalıq sanı boyınsha anıq hám tolıq maǵlıwmatlar xalıqtı dizimge alıw tiykarında alınadı.
 

Xalıqtı dizimge alıw ilájin ótkeriw bizge ne beredi?

1. Belgili bir sánede xalıqtıń anıq sanı (jası hám jınıs quramı, puqaralıǵı, milliy quramı, barlıq elatlı punktler boyınsha sanı, shańaraq jaǵdayı, maǵlıwmat dárejesi, úy-jay menen támiyinlengenlik dárejesi, miynet resursları, ekonomikalıq aktiv xalıq, xalıq bántligi hám jumıssızlıǵı, dáramat alıw derekleri, nágiranlıǵı) boyınsha tolıq maǵlıwmat alınadı;
2. Xalıq jan basına makroekonomikalıq kórsetkishlerdi esaplawda (jalpı ishki ónim, xalıq dáramatları, sanaat ónimi kólemi, tutınıw ónimleri kólemi, xalıqqa kórsetiletuǵın xızmetler kólemi, awıl xojalıǵı ónimleri) isletiledi;
3. Xalıq migraciyası haqqındaǵı maǵlıwmatlar sáwlelenedi.
4. Respublika hám aymaqlardı sociallıq-ekonomikalıq rawajlandırıw, xalıq bántligi, hayallar hám balalar salamatlıǵın jaqsılaw hám shańaraqlarǵa járdem kórsetiw boyınsha dástúrlerdi mánzilli islep shıǵıwda maǵlıwmat retinde paydalanıladı.
5. Statistika mákemeleri tárepinen shólkemlestiriletuǵın tańlama gúzetiwlerdi shólkemlestiriwde maǵlıwmatlar bazası retinde qollanıladı.
6. Milliy turaqlı rawajlanıw maqsetlerin ámelge asırıw kórsetkishlerin qáliplestiriw hám monitoringin júrgiziwde xızmet etedi.
7. Elatlı punktlerdiń infrastrukturasın jaqsılawda, miynet resurslarınan paydalanıw hám jaylastırıw boyınsha qısqa, orta hám uzaq múddetli prognozlar, dástúrlerdi islep shıǵıwda paydalanıladı.
8. Xalıqaralıq shólkemler hám paydalanıwshılar tárepinen ámelge asırılatuǵın analizler ushın keń kólemli maǵlıwmatlar deregi esaplanadı.

 Bunday maǵlıwmatlar sociallıq-ekonomikalıq processlerdi prognoz qılıw, bántlik tarawındaǵı siyasattı belgilew, social siyasat hám xalıq salamatlıǵı boyınsha dástúrlerdi islep shıǵıwda, sonıń menen birge mámleketlik hákimiyat organlarınıń wazıypaların orınlawı, pán hám jámiyetti maǵlıwmat penen támiyinlew ushın zárúr bolıp tabıladı.

Qanlıkól rayonı statistika bólimi