Byudjet procesinde puqaralar belsendiligi támiyinlenedi



 Byudjet procesinde puqaralardıń belsene qatnasıwın támiyinlew boyınsha Ózbekstan Respublikası Prezidentiniń 2021-jıl 13-aprel kúngi “Byudjet procesinde puqaralardıń belsene qatnasıwın támiyinlew boyınsha qosımsha is-ilajları haqqında”ǵı PQ-5072-sanlı Qararı qabıl etildi. 2022-jıl 1-yanvardan baslap,  rayon jergilikli byudjetiniń tastıyıqlangan ulıwma qárejetleriniń 5 payızı muǵdarında qarjılar belsendi byudjet procesine jóneltiriliwi hámde jergilikli byudjettiń qosımsha derekleriniń keminde 10 payızı, 2021-jıl 1-iyuldan 30 payızı jámiyetshilik pikiri tiykarında ilájlarga sarıplanıwı kórsetilgen. “Belsendi byudjet” procesinde qatnasıp, óz aymagıńızdı sociallıq hám ekonomikalıq rawajlanıwı ushın usınıs kiritiw hám dawıs beriw imkaniyatına iyesiz. Mısalı,  dem alıw orınları,  balalar maydanshasın payda etiw,  ishki jollardı hám sociallıq tarmaq obektlerin ońlaw,  ekologiyanı jaqsılaw,  ishimlik hám aqaba suwı menen támiyinlew,  kóshe jaqtılandırıw shıraqların ornatıw (ońlaw) hám sol qatarı basqa ilájlarga jumsaladı. 

 Usı qarar tiykarında,  Ózbekstan Respublikası Oliy Majlisi Senatı Keńesiniń 2021-jıl 22-aprel kúngi “Jergilikli byudjet qarjıları sarıplanıwında jámiyetshilik qatnasıwın támiyinlew haqqında»ǵı qararı qabıl etildi. Puqaralar belsendilik qorına jámi 478,2 mln.swm qarjı jóneltirildi. Belsendi byudjet procesi usı jılda sınaw retinde 1-iyuldan 2-sentyabr kúnine shekem 3 basqıshta ótkerildi. 

 1-basqısh 2021-jıldıń 1-iyul kúninen 31-iyul kúni aralıǵında usınıs qaldırıw procesi bolıp ótti. Bunda puqaralar tárepinen óz aymaǵındaǵı bar bolǵan mashqalalarǵa sheshim tabıw boyınsha «openbyudjet.uz» málimleme portalı arqalı 298 usınıslardı bildirdi.
 2-basqısh usı jıldıń 1-avgustınan 12-avgust kúnine shekem usınıslardı tańlaw procesinde,  barlıq usınıslar moderaciyadan ótkerilip,  arnawlı komissiya tárepinen kórip shıǵıldı hám 198 usınıs qabıl etilip,  dawıs beriw basqıshına ótkerildi. 100 usınıs belgilengen kriteriyaǵa sáykes emesligi sebepli qabıllanbadı.
 3-basqısh dawıs beriw procesi usı jıldıń 13-avgustınan 2-sentyabr kúnine shekem qabıl etilgen usınıslarga dawıs beriw procesi bolıp ótti.

 Puqaralar tárepinen jámi 7072 dawıslar berildi. Sonnan: «Openbyudjet.uz» málimleme portalına puqaralar tárepinen ID 0130300019 arqalı bildirilgen Qanlıkól rayoni «Qosjap» APJ Begjap awılına mektepke keletin jolǵa 2.5 km aralıqqa sarı qumli asfalt jol salıp beriw usınısına 3065 dawıs,  ID 0130300241 arqalı bildirilgen Máhállemiz abadanlıǵı usınısına 2841 dawıs,  ID 0130300128 arqalı bildirilgen Altınkól APJ aymaǵına Gazon salıw usınısına 485 dawıs,  
ID 0130300023 arqalı bildirilgen Taza posyolkaǵa jol salıw usınısına 168 dawıs,  ID 0130300075 arqalı bildirilgen Madeniyat MPJ Gulabad kóshesine gaz, suw, toq,  asfalt tartıp beriw boyınsha usınısına 128 dawıslar berildi.

 Belsendi byudjet procesi juwmaqlarına kóre,  «Openbyudjet.uz» málimleme portalına ID 0130300019 arqalı bildirilgen Qanlıkól rayonı Qosjap APJ Begjap awılına mektepke keletin jolǵa 2.5 km aralıqqa sarı qumli asfalt jol salip beriw usınısına 3065 dawıs toplap jeńimpaz dep tabıldı. Jeńimpaz dep tabılǵan usınıstı qarjılandırıwga “Puqaralar belsendilik qorı” esabınan Qanlıkól rayonı Qosjap APJ Begjap awılına mektepke keletin jolǵa 2.5 km aralıqqa sarı qumli asfalt jol salıp beriw usınısına 350,0 mln.swm qarjılar ajratılıwı názerde tutılmaqda.

Qanlıkól rayonı hákimligi Qarjı bólimi.