«Bárkamal awlad» orayında bir kún 



Mámleketimizde jas óspirimlerdiń bilim alıwları ushın jaratılǵan sharayatlar hám xalqımızdıń talabı menen orayǵa bolǵan talapta hár kúni artıp atır.
Qanlıkól rayonı xalıq bilimlendiriw bólimine qaraslı «Bárkamal áwlad» balalar orayında búgingi kúnde jámi 24 baǵdar boyınsha dógereklerde balalar óner sırların úyrenip kelmekte. 
Balalardıń qızıǵıwshılıqları inabatqa alınıp oray shólkemlestiriwi menen rayon aymaǵındaǵı 2, 23, 15, 17-sanlı ulıwma orta bilim beriw mekteplerinde oraydıń filialları shólkemlestirilip awıl balalarıda oray xızmetlerinen paydalanıw múmkinshiligine iye boldı. Orayda dógereklerge qızıǵıwshań balalardı anıqlaw, dógereklerge tartıw hám jańa innovaciyalıq ideyaların qollap-quwatlaw baǵdarında alıp barılıp atırǵan ámeliy ilajlar sheńberinde rayonlıq xalıq bilimlendiriw bólimi hám «Bárkamal áwlad» balalar orayı menen  birgelikte «Dógerekler yarmarkası» shólkemlestirildi. 
Yarmarkaǵa tiykarınan rayonlıq ulıwma orta bilim beriw mektepleri oqıwshı jasları qatnasıp orayda jaratılǵan sharayatlar, hárekettegi dógerekler hám bul jerdegi oqıw ámeliy jumısları menen jaqınnan tanıstı. 
Elimizde oqıwshı jaslarımızdaǵı belsendilikler bul orındaǵı qızıǵıwshılıqlardan kózge taslanadı. Ásirese qız balalar ushın toqımashılıq, tigiwshilik, milliy taǵam tayarlaw, sonday-aq radiotexnika, kórkem-óner, úlke tanıw hám ekologiya, kompyuter texnologiyaları hám basqada baǵdarlar boyınsha islengen jumıslar qatnasıwshılarda úlken tásirler qaldırdı. 
Sonday-q, elimizde ótkerilip atırǵan ilajlar negizinde qatnasıp kiyatırǵan oray tárbiyalanıwshıları 19-20-oktyabr kúnleri Qaraqalpaqstan Respublikası Moynaq rayonında ótkerilgen festivalda belsene qatnasqanı ushın nominaciya hám estelik sawǵaları menen sıylıklandı.
 Bul ótkerilgen ilajlar oqıwshı jaslardıń jańa innovaciyalıq ideyaların qollap-quwatlaw hám júzege shıǵarıwında tiykar bolıp xızmet etedi.