Жәмлеспеген ҳаял-қызлар менен «Исбилерменликке баслама» атамасында семинар



 

Қанлыкөл районлық ҳаял-қызлар комитети басшылығында район аймағындағы жәмлеспеген ҳаял-қызлар ҳәм жумыссыз үй бийкелери арасында «Исбилерменликке баслама» атамасында семинар өткерилди.

Семинардың мақсети Ҳаял-қызларды ҳәм шаңарақларды қоллап-қуўатлаў фонды ҳәмде Микрокредит банки меморандумы тийкарында берилетуғын жеңиллетилген 7 пайызлы кредиттиң алыў тәртиби ҳәмде исбилерменлик жумысын баслаў ҳәм алып барыў бойынша түсиниклер бериўге қаратылған.

Семинар даўамында, ҳаял-қызлар арасында исбилерменлик жумысын баслаў, шаңарақта экономикалық дәрамат дерегин табыў бойынша исбилерменлик тараўы түрлери, исбилерменлик көнликпелерин раўажландырыў ҳәмде тамарқа жерден үнемли пайдаланыў, сондай-ақ, шаңарақ исбилерменлигин жолға қойыўда киши бизнес түрлери, шаңарақлық мектепке шекемги билимлендириў мекемесин ашыў, оның тәртиби менен  ажыратылатуғын кредитти алыўда көрсетилетуғын әмелий жәрдемлер ҳаққында мысаллар арқалы түсиниклер берилди.

Буннан тысқары, семинар даўамында район аймағында усы күнге дейин районлық мәмлекетлик хызметлер орайы арқалы 77 исбилермен ҳаял-қызлар дизимнен өткенлиги ҳәмде өнерментлер бирлеспеси ағзалығында  15 ҳаял-қызлардың жүритип атырған исбилерменлик жумыслары үлги ретинде көрсетилди.