Ийис газинен келип шығатуғын жағдайлардың алдын алайық 



 

Қарақалпақстан Республикасы айрықшы жағдайлар басқармасы  менен өрт қәўипсизлиги ҳәм де газ тәмийнаты бөлимлери тәрепинен «Ийис газинен сақланың», «Ийис газинен зәҳәрлениўден абайлы болың» сүренлери менен барлық орынларда үгит-нәсият жумыслары алып барылмақта.

Үгит нәсият жумысларында ийис газиниң пайда болыўы, оның жағымсыз ҳалатларының алдын алыў, ийис газинен зәҳәрленгенде биринши жәрдем көрсетиў  жағдайларына қаратылған.

Ийис гази-бул реңсиз болып, оның ең қәўипли тәрепи ол өкпе арқалы кирип, қанға сорылады ҳәм қандағы кислород орнын ийелейди. Оның ақыбетинде кислород жетиспеўшилиги гипоксия жүз береди. Орайлық нерв системасының зәҳәрлениўге алып келген күшли зәҳәрлениў жүз бергенде тез биринши жәрдем көрсетилмесе инсан өмирден көз жумыўы мүмкин.

Қыс паслының қарлы, қыраўлы күнлеринде хожалықларда газди жағып пайдаланыўда қәте-кемшиликлерге жол қоймай, үйдиң ҳаўа алмасыў морысын тез-тезден тазалап турылса,  бундай ҳәдийселердиң алды алынады.

Тәбийий газдиң бөлме ишинде топланыўы ақыбетинде өрттиң келип шығыўы ҳәм буның нәтийжесинде инсан түрли жарақат алыўы мүмкин. Бундай жағымсыз жағдайлар тәбийий газдиң толық жанбаўы, хананы ысытыў қурылмалары қағыйдаларына итибарсыз пайдаланғанда ҳәмде техника қәўипсизлигине итибарсызлықлардан келип шығады.

Инсанлар күнделикли турмыста пайдаланатуғын газден зәҳәрленип, бахытсыз ҳәдиселердиң келип шығыўы мүмкин болған жағдайлардан сақланыў керек. Биринши нәўбетте асханаға киргенде айна ҳәм есиклерди ашып, бөлмени толық самаллатыў, кейин ийис гази жоқлығына анық исеним қабыл етип электр яки газден пайдаланыўымыз лазым.

Зәҳәрлениў жүз бергенде адамның дем алыўы қыйынласып, ҳәттеки ҳәрекетсиз қалыўыда мүмкин. Зәҳәрленген адамға биринши жәрдем көрсетилгенде таза ашық ҳаўаға алып шығыў, ыссы ҳәм тыныш хана менен тәмийинлеў, сүт иштириў, жасалма дем берилиўи тийис ҳәмде 103 телефон номери арқалы тез жәрдемге, 104 номери арқалы газ тармақларына сондай-ақ, күтилмегенде қәўипли ҳәдийселер жүз берсе 1050 телефон номерине қоңыраў етип Қутқарыў хызметине мүрәжат етиўиңиз керек.

Илажлар даўамында, ийис гази ақыбетинде келип шығатуғын унамсыз ҳәдийселердиң алдын алыўда бәршени биргеликте итибарлы болыўға, сергекликке шақырды.