Iyis gazinen kelip shıǵatuǵın jaǵdaylardıń aldın alayıq



Qaraqalpaqstan Respublikası ayrıqshı jaǵdaylar basqarması  menen órt qáwipsizligi hám de gaz támiynatı bólimleri tárepinen «Iyis gazinen saqlanıń», «Iyis gazinen záhárleniwden abaylı bolıń» súrenleri menen barlıq orınlarda úgit-násiyat jumısları alıp barılmaqta.

Úgit násiyat jumıslarında iyis gaziniń payda bolıwı, onıń jaǵımsız halatlarınıń aldın alıw, iyis gazinen záhárlengende birinshi járdem kórsetiw  jaǵdaylarına qaratılǵan.

Iyis gazi-bul reńsiz bolıp, onıń eń qáwipli tárepi ol ókpe arqalı kirip, qanǵa sorıladı hám qandaǵı kislorod ornın iyeleydi. Onıń aqıbetinde kislorod jetispewshiligi gipoksiya júz beredi. Oraylıq nerv sistemasınıń záhárleniwge alıp kelgen kúshli záhárleniw júz bergende tez birinshi járdem kórsetilmese insan ómirden kóz jumıwı múmkin.

Qıs paslınıń qarlı, qırawlı kúnlerinde xojalıqlarda gazdi jaǵıp paydalanıwda qáte-kemshiliklerge jol qoymay, úydiń hawa almasıw morısın tez-tezden tazalap turılsa,  bunday hádiyselerdiń aldı alınadı.

Tábiyiy gazdiń bólme ishinde toplanıwı aqıbetinde órttiń kelip shıǵıwı hám bunıń nátiyjesinde insan túrli jaraqat alıwı múmkin. Bunday jaǵımsız jaǵdaylar tábiyiy gazdiń tolıq janbawı, xananı ısıtıw qurılmaları qaǵıydalarına itibarsız paydalanǵanda hámde texnika qáwipsizligine itibarsızlıqlardan kelip shıǵadı.

Insanlar kúndelikli turmısta paydalanatuǵın gazden záhárlenip, baxıtsız hádiselerdiń kelip shıǵıwı múmkin bolǵan jaǵdaylardan saqlanıw kerek. Birinshi náwbette asxanaǵa kirgende ayna hám esiklerdi ashıp, bólmeni tolıq samallatıw, keyin iyis gazi joqlıǵına anıq isenim qabıl etip elektr yaki gazden paydalanıwımız lazım.

Záhárleniw júz bergende adamnıń dem alıwı qıyınlasıp, hátteki háreketsiz qalıwıda múmkin. Záhárlengen adamǵa birinshi járdem kórsetilgende taza ashıq hawaǵa alıp shıǵıw, ıssı hám tınısh xana menen támiyinlew, sút ishtiriw, jasalma dem beriliwi tiyis hámde 103 telefon nomeri arqalı tez járdemge, 104 nomeri arqalı gaz tarmaqlarına sonday-aq, kútilmegende qáwipli hádiyseler júz berse 1050 telefon nomerine qońıraw etip Qutqarıw xızmetine múrájat etiwińiz kerek.

Ilajlar dawamında, iyis gazi aqıbetinde kelip shıǵatuǵın unamsız hádiyselerdiń aldın alıwda bársheni birgelikte itibarlı bolıwǵa, sergeklikke shaqırdı.