«Нәшебентликке қарсы гүресиў» айлығы



Өзбекстан Республикасы Ишки Ислер Министрлигиниң 2019-жыл 15-январь күнги, усы жылдың 1-февралдан 1-март күнлери аралығында «Нәшебентликке қарсы гүресиў» айлығы шеңберинде «Жаслар арасында нәшебентлик затлардың тарқалыўына қарсы гүресиў» оператив профилактикалық илажын өткериў ҳаққындағы арнаўлы көрсетпеси тийкарында, Қанлыкөл районы Педагогика колледжинде район ҳәкимлиги, районлық ишки ислер бөлими тийисли мекемелер менен биргеликте, оқыўшы жаслар арасында үгит-нәсият илажлары өткерилмекте.

Үгит-нәсият илажлары барысында, дәслеп «Әжелге жетелеўши жоллар» атамасындағы видеоролик қойып берилди ҳәмде нәшебентлик, наркомания сыяқлы жаман иллетлерге қарсы гүресиў, олардың алдын алыў, иллеттиң инсанға, өмирине, келешегине кери тәсири менен оның ақыбетлери, иллеттиң тийкарының пулға шағылыўы әлбетте, ҳуқықбузарлық ҳәм жынаятшылықтың келип шығыўына себеп болыўы ҳақкында кең түрде мысаллар менен  мағлыўматлар айтып өтилди.

Сондай-ақ, бул жаман иллетке жолыққан дүньяда 500 млннан аслам адамның тийкарғы бөлегин 30 жасқа шекемги жаслар қурайтуғынлығын ҳәм буның ақыбетинде 200 мыңнан аслам адамлар өмирден ерте көз жумып атырғанлығын, жүз берип атырған жынаятшылық ҳәм ҳуқықбузарлықлардың 57 пайызы усы иллетке араласқан жаслар екенлиги ҳаққында мысалларды келтирип өтилди. Бул мысаллардан үлги емес өзиңиз өмириңиз даўамында қайталамастан, келешегиниң аянышлы тамамланатуғын аўыр ақыбетлеринен сақланыўы, соның менен бирге жәмийетшиликте бул жолдағыларды қайтарыўға шақырды.

 «Нәшебентликке қарсы гүресиў» айлығы шеңберинде үгит-нәсият илажлары район аймағындағы барлық билимлендириў мекемелери ҳәм пуқаралар жыйынлары менен жәмийетлик шөлкемлерде даўам етпекте.