Көшпели қабыллаўда жас фермерлердиң мүрәжатлери тыңланды



 

Өзбекстан Республикасы Президентиниң 2018-жыл 28-декабрь күнги Олий Мажлиске жоллаған Мүрәжатнамасы ҳәм Өзбекстан Жаслар аўқамы Орайлық Кеңесиниң 2019-жыл 23-январь күнги 04-02/38-санлы бийлигине муўапық, Қанлыкөл районында жас фермерлер қатнасында көшпели қабыллаў шөлкемлестирилди.

Көшпели қабыллаўдың мақсети, жас фермерлер ҳәмде фермер болыў нийетиндеги жаслардың аграрлық тараўындағы билимин еледе жетилистириў, жаңа фермер хожалықларын көп тармақлы фермер хожалықларына айландырыўына жәрдем бериў, заманагөй инновациялық билим дәрежесин асырыў, фермер хожалықларында ушырасып атырған машқалаларды сапластырыўдан ибарат.

Көшпели қабыллаўда, Өзбекстан Жаслар аўқамы жанындағы Өзбекстан жаслар фермерлер Кеңеси, Қарақалпақстан Республикасы аймақлық бөлими баслығы А.Алланиязов, район ҳәкимлиги, Өзбекстан Жаслар аўқамы районлық Кеңеси, Дийқан фермер хожалықлары ҳәм мөлтек жер ийелери районлық Кеңеси, коммерциялық банклердиң районлық бөлими менен тийисли мекеме шөлкемлер қәнийгелери қатнасты.

Қабыллаў даўамында, аўыл хожалығы тараўын раўажландырыў бойынша «Томорқа» китабының мазмуны ҳақкында түсиниклер берип өтилди.

Көшпели қабыллаўда, район аймағындағы жас фермерлерден аўыл хожалығы техникасын алыўы ушын 250 млн сўм, шарўашылық фермер хожалығын кеңейтиў ушын 100 млн сўм муғдарында жеңиллетилген кредит алыўы бойынша мүрәжатлары тыңланып, 2019-жылдың мәнзилли дизимине алыныўы бойынша тийисли тараў басшыларына тапсырмалар берилди.

Сондай-ақ, «Акимова Жупаргүл» фермер хожалығы баслығы А.Қосбергенов фермер хожалығы есап бети коммерциялық банклердиң Қоңырат районлық бөлиминде ашылғанлығын, есап бетин Қанлыкөл районлық бөлимине өзгертиў бойынша мәселеси сол ўақыттың өзинде сапластырылатуғынлығы айтылды.