Мәмлекетлик хызметлер орайында көшпес мүлк объектлери мәмлекетлик дизимнен қалай өткериледи



Өзбекстан Республикасы Президентиниң 2018-жыл 27-июль күнги «Исбилерменлик субъектлериниң ҳуқықлары ҳәм нызамлы мәплерин қорғаў системасын жәнеде жетилистириў ис-иләжлары ҳаққында»ғы ПФ-5490-санлы Пәрманы ҳәмде көшпес мүлк объектлерине болған ҳуқықларын мәмлекетлик дизимнен өткериў ушын қолайлы шараятлар жаратыў мақсетинде, Өзбекстан Республикасы Министрлер Кабинетиниң 2018-жыл 29-декабрьдеги 1060-санлы қарары менен юридикалық ҳәм физикалық шахслардың көшпес мүлк объектлерине болған ҳуқықларын мәмлекетлик дизимнен өткериў тәртиби белгиленди.

Көшпес мүлк объектлерине болған ҳуқықлардың жүзеге келиўи, басқа шахсқа өтиўи, шеклениўи ҳәм бийкар болыўы мәмлекетлик дизимнен өткерилиўи керек. Юридикалық ҳәм физикалық шахслардың көшпес мүлкке болған ҳуқықы пәрманға муўапық мәмлекетлик дизимнен өткерилгеннен кейин күшке киреди. Мәмлекетлик дизимнен өткерилмеген питимлер ҳақыйқый емес деп есапланады.

Көшпес мүлк объекти мүлкдарлары ямаса усы объект бойынша дәлийлли ҳуқықлар ийелери болған юридикалық ҳәм физикалық шахслардың көшпес мүлк объектиниң ҳуқықый ҳалаты өзгерген куннен баслап, бир ай мүддетте мәмлекетлик дизимнен өткериўши органға тийисли ҳүжжетлерди қосымша қылған ҳалда көшпес мүлк объектлерине болған ҳуқықларды мәмлекетлик дизимнен өткериў ҳаққында арза менен көшпес мүлк орнындағы Мәмлекетлик хызметлер орайларына ямаса Интерактив мәмлекетлик хызметлер бирден-бир порталы арқалы, гиреў хаты рәсмийлестирилгенде болса–көшпес мүлк объектине болған ҳуқықты мәмлекетлик дизимнен өткериўши органға мүражәт етиўлери шәрт.

Мәмлекетлик хызметлер орайы арза толтырылғаннан кейин бир саат даўамында оны көшпес мүлк объектине болған ҳуқықты мәмлекетлик дизимнен өткериўди әмелге асыратуғын органға жибереди.

Арза тийкарында, көшпес мүлк объектине кадастр ҳүжжетлери бойынша Реестрде бар болған мағлыўмат пенен салыстырады, көшпес мүлк объекти юридикалық ямаса физикалық шахсқа өткерилиўиниң нызамлылығын анықлайды, улыума үлесли мүлк ҳуқуқы қатнасыўшылардың санын ҳәм тийисли ҳүжжетлер бар болған жағдайда, олардың үлеслерин анықлайды, ҳуқықлардың мәмлекетлик дизимнен өткерилиўи ушын тосқынлық қылатуғын факторларды, бул көшпес мүлк объектти ҳуқуқтың басқа шахсларға өткерилиўи ушын тосқынлық қылыўшы гиреўге қойылғанлығы ямаса ҳуқықты шеклеў барлығын анықлайды. Басқа шахслардан усы көшпес мүлк объекти бойынша мәмлекетлик дизимнен өткериў ушын арза бар ямаса жоқлығын Реестрден анықлайды.

Дизимнен өткериўши көшпес мүлкке болған ҳуқықты тастыйықлаўшы ҳүжжетлер бар болған жағдайда, көшпес мүлкке болған ҳуқуқларды ҳүжжетлер келип түскен күннен баслап еки жумыс күни даўамында мәмлекетлик дизимнен өткереди.

Мәмлекетлик хызметлер орайы дизимнен өткериўши органнан көшпес мүлк объектине болған ҳуқықты дизимнен өткериўди тоқтатып турыў ҳаққындағы қарарды алғаннан кейин юридикалық ҳәм физикалық шахсты бир саат даўамында көрсетилген кемшиликлерди сапластырған ҳалда ҳүжжетлерди усыныс етиў ҳаққында хабардар қылады. Ҳүжжетлер көрсетилген кемшиликлер сапластырылып усыныс етилгенде, көшпес мүлк объектлерине болған ҳуқуқларды мәмлекетлик дизимнен өткериў ҳүжжетлер усыныс етилген күннен баслап еки жумыс күни даўамында әмелге асырылады. Егер, хабарнама көрсетилген кемшиликлер хабар берилген ўақыттан баслап үш жумыс күни даўамында сапластырылмаса, мәмлекетлик дизимнен өткериўши орган еки жумыс күни даўамында көшпес мүлк объектине болған ҳуқықларды мәмлекетлик дизимнен өткериўди бийкар етиў ҳаққында қарар қабыл қылады ҳәм бул ҳаққында орайды жазба түрде хабардар етеди.