Районда жас ўатан қорғаўшылар қәлиплеспекте



Районлық орта арнаўлы кәсип-өнер колледжлери оқыўшы жасларының бос ўақтын мазмунлы өткериў, олар ортасында саламат турмыс тәризин үгит-нәсиятлаў, мәдений спорт түрлерин жолға қойыў ҳәмде жасларды спорт ойынларына бәршени қамтып алыў, дәслепки әскерий ҳәм психологиялық таярлыққа ийе ўатансүйгиш, жуўапкершиликли, қыйын ҳәм экстремал жағдайларда туўры ҳәрекетлениў көнликпелерин ийелеген баркамал әўладты тәрбиялаў мақсетинде, бир қанша жумыслар әмелге асырылмақта.

Усындай илажлар шеңберинде, Өзбекстан Жаслар аўқамы Орайлық Кеңеси, Қорғаныў министрлиги, Ишки ислер министрлиги, Дене тәрбия ҳәм спорт мәмлекетлик комитети, Мәденият министрлиги, Ден-саўлықты сақлаў министрлиги ҳәмде Орта арнаўлы, кәсип-өнер билимлендириў орайлары тәрепинен тастыйықланған қоспа қарары тийкарында, Қанлыкөл районы ҳәкимлиги, Өзбекстан Жаслар аўқамының районлық Кеңеси бирге ислесиўши шөлкемлер менен биргеликте «Буркит» әскерий спорт жарысының районлық басқышы өткерилди.

Район аймағындағы колледжлер командалары, әскерий спорт жарысы даўамында, 9 шәрт бойынша беллести ҳәмде жарыс нызам қағыйдалары тийкарында баҳаланды.

Жарыс жуўмағында Қанлыкөл Педагогика колледжи командасы 1-орынды алыўға ерисип, шөлкемлестириўшилер тәрепинен диплом ҳәм естелик саўғалар менен сыйлықланды.