Районда абаданластырыў айлығы



Қанлыкөл районында бәҳәр айының басланыўы менен район аймақларында “Абаданластырыў ҳәм көклемзарластырыў айлығы”  шөлкемлестирилди.

Айлық шеңберинде халқымыз арасында өз-ара ҳүрмет-иззет ҳәм бирге ислесиўди жәнеде күшейтиў, бийғәрез жәрдем меҳир мириўбетлилик көрсетиў пазыйлетлерин жүзеге шығарыўда мәҳәллелерди, халықтың турар жайларын абаданластырыў ҳәм санитариялық жағдайын жақсылаў мақсетинде районда абаданластырыў илажлары әмелге асырылмақта.

Илажлар даўамында, райондағы көп қабатлы үйлер ҳәм имаратлар әтираплары, зыярат орынлары,  жап-салмалар, көшелер ҳәм пиядалар жүрер жолы ҳәм балалар майданшаларын тазалаў, тереклерди ҳәклеў ҳәм форма бериў, егислик жер майданларын тазалаў жумыслары алып барылды.

Район аймағындағы социаллық қорғаўға мүтәж кекселер, пенсионерлер ҳәм майыплар, жалғыз баслы қариялар, кем тәмийинленген  ҳәм бағыўшысын жоғалтқан шаңарақлардың үй-жайларының әтирапларын тәртипке келтириў, жеңил оңлаў жумыслары алып барылып,  шаңарақлардың үй қапталлары тазаланып, киши ыссыханалар қурылып, қыйтақ жерлерине мийўе нәллери отырғызылып қайырхомлық илажлары исленди.

Район аймағында абаданластырыў ҳәм көклемзарластырыў жумыслары ҳәр ҳәпте алтыншы, жетинши күнлери, апрель айының ақырына шекем даўам етеди.