«Жайхун»  стадионы  пайдаланыўға  тапсырылды



2019-жыл 25-март кни Қанлыкөл районы ҳәкимлиги мәжилислер залында, Қарақалпақстан Республикасы Жоқарғы Кеңеси Баслығы М.Ерниязов басшылығында болып өткен мәжилисте, Қанлыкөл районын комплекс социаллық-экономикалық  раўажландырыў бойынша әмелге асырылатуғын ис-илажлар мәселеси қаралып, Қанлыкөл районы орайын абаданластырыў, социаллық ҳәм базар инфраструктуралық объектлериниң  қурылыс  ҳәм оңлаў,  жол  қурылысы, инженерлик коммуникация тармақларын жақсылаў бойынша ислениўи лазым болған қатар жумыслар белгиленип алынғанеди.

1-июнь куни бағдарлама шеңберинде, 1000 орынға мөлшерленген «Жайхун» стадионының қурылысы жуўмақланып, ашылыў салтанаты болып өтти.

Ашылыў мәресимине Қарақалпақстан Республикасы Жоқарғы Кеңеси Баслығы М.Ерниязов қатнасты ҳәм район халқын жуз берип атырған жаңаланыўлар менен қызғын қутлықлады. Соң, район ҳәкими Д.Толыбаев сөзге шығып, қолы гул қурылысшыларға ҳәм район халқының аўызбиршилигине айрықша алғыс айтты.

Қурылысислерин әмелге асырған «бахыт Миратдин» ЖШЖ баслығы Б.Салатдиновқа, район ҳәкимлиги тәрепинен арнаўлы диплом ҳәм баҳалы саўғалар миннетдаршылық ретинде тапсырылды.

Сондай-ақ, стадионның  символлық  гилти Қанлыкөл районы Балалар өспиримлер спорт мектеби директоры Б.Атабаевқа тапсырылды.

«Жайхун» стадионындағы дәслепки ойын Қанлыкөл Балалар өспиримлер спорт мектеби тәрбияланыўшылары ҳәм Хожели Балалар өспиримлер спорт мектеби тәрбияланыўшылары арасында футбол бойынша жарыс болып өтти. 1-2-тайм жуўмақларына көре, Қанлыкөл 2:2 Хожели есабында, дослық жеңимпаз болды.

Буннан соң, Қарақалпақ  эстрадасының  көрнекли ўакиллери ҳәм «Айқулаш» ансамбли ойыншылары  атқарыўында йошлы концерт  бағдарламасы жыйналғанлардың нәзерине усынылды.

Сондай-ақ, районлық Мектепке шекемги билимлендириў мәкемелери  тәрбияланыўшыларының турли аяқ ойынлары бәршеге заўық бағышлады.

Буннан соң, Нөкис-Хожели Кариялар командасының футбол жарысы болып өтти. 1-2-тайм нәтийжелерине көре, Нөкис 2:3 Хожели есабында, Хожели командасы жеңимпаз болды.

Ашылыўсалтанаты жуўмағында, 1-июнь «Балаларды қорғаў куни» мунәсебети менен байрам илажлары даўам етти ҳәм халық сейилге шықты.