«10 күнде ең көп пахта терген шаңарақ» таңлаўы жеңимпазына «Спарк» саўға етилди



  Өзбекстан Республикасы Министрлер Кабинетиниң 2019-жыл             18-сентябрьдеги 01-03/1-1711-санлы, Қарақалпақстан Республикасы Министрлер Кабинетиниң 2019-жыл 26-сентябрьдеги 01-08/8-09/669-санлы мәжилиси баянламасының орынланыўын тәмийинлеў ҳәм быйылғы пахта жыйын-терим мапазын жәмлескенлик пенен шөлкемлестириў, жетистирилген пахта хасылын зая етпестен терип алыў ҳәмде теримшилерди хошаметлеў мақсетинде, Қанлыкөл районы ҳәкимлигиниң 2019-жыл                  27-сентябрьдеги 1-9/148-санлы мәжилис баянын басшылыққа алып, районда 27-сентябрьден, 7-октябрь аралығында «10 күнде ең көп пахта терген шаңарақ» таңлаўы шөлкемлестирилди. Таӊлаӯға район аймағынан жәми 3 шаӊарақ қатнасып, ел қырманын бәлентлетиӯ ушын ат салысты.

  Таңлаў жуўмағы бойынша болып өткен илажға, Қарақалпақстан Республикасы Жоқарғы Кеңеси Баслығы М.Ерниязов, Өзбекстан Кәсиплик аўқамлары федерациясының Қарақалпақстан кәсиплик аўқамлары шөлкемлери бирлеспеси Кеңеси баслығы У.Жәлменов, Пуқаралардың өзин-өзи басқарыў уйымлары жумысларын муўапықластырыўшы республикалық Кеңеси баслығының биринши орынбасары Т.Романов, Қарақалпақстан Республикасы Бәнтлик ҳәм мийнет қатнасықлары министри У.Сабуров, район ҳәкими Д.Толыбаев ҳәм басқалар қатнасты.

  Қызғын беллесиӯлерге бай болған таӊлаӯ жуӯмағы бойынша «Мәденият» мәкан пуқаралар жыйынынан Ж.Ешжанованыӊ шаӊарағы 10 күн даӯамында, «Замира қазаяқлы» ҳәм «Умар гарант агро» фермер хожалықларының пахта майданында, пахта жыйын-теримине белсене қатнасып, 8261 кг пахта терди ҳәм ел қырманына тапсырды. Жеңимпазға Қарақалпақстан Республикасы Жоқарғы Кеңеси тәрепинен «Спарк» автомашинасы инам етилди.

Сондай-ақ, танлаўға «Жаңа қала» аўыл пуқаралар жыйыны аймағынан П.Муратбаевтың шаңарағы 4945 кг ал, «Қанлыкөл» посёлкалық пуқаралар жыйынынан Ш.Өтемисованың шаңарағы 2423 кг терип, мапазда  белсендилик көрсеткенлиги ушын шөлкемлестириӯшилер тәрепинен қымбат баҳалы саўғалар менен сыйлықланды.