«Зульфия қызлары» таӊлаӯыныӊ районлық басқышы болып өтти



  1999-жыл 10-июньда Өзбекстан Республикасы Президентиниӊ «Зульфия атындағы мәмлекетлик сыйлықты енгизиӯ бойынша усынысларды қоллап-қуӯатлаӯ ҳаққында»ғы арнаӯлы Пәрманы қабыл етилген еди. Ал, 2018-жыл 29-март күни усы Пәрманға бир қатар өзгерислер киритилди. Сол тийкарда, ҳәр жылы республикамыз бойлап, Зульфия атындағы мәмлекетлик сыйлыққа талабан, қәбилетли ҳәм талантлы қызлар сараланады. Усы мақсетте, райондағы 19-санлы Балалар музыка ҳәм көркем-өнер мектебинде таӊлаӯдыӊ районлық басқышы болып өтти. 

  Таӊлаӯды район ҳәқиминиӊ орынбасары, районлық Ҳаял-қызлар комитети баслығы С.Жуманова кирис сөз бенен ашты, сондай-ақ, таӊлаӯдыӊ мақсети, талаплары, тәртиби туӯралы келтирди ҳәм бәрше талабанларға теӊдей әӯмет тиледи. 

  Таӊлаӯда 14-30 жас аралығындағы қызлар 7 (әдебият, мәденият, көркем-өнер, пән, билимлендириӯ, спорт ҳәм жәмәәтшилик) жөнелис бойынша өз-ара беллести.

  Таӊлаӯ барысында, қатнасыӯшылар өз жөнелислери бойынша төрешилер қурамы тәрепинен тийисли  тәртипте баҳаланды ҳәм белсене қатнасқан бәрше қызлар район ҳәкимлигиниӊ «Ҳүрмет жарлығы» менен сыйлықланды. Таӊлаӯдыӊ районлық басқыш жеӊимпазлары Қарақалпақстан Республикасы басқышына жолламаны қолға киргизеди.