Қанлыкөлде «Бес баслама-бес имканият» жаслар фестивалы өткерилди



 Өзбекстан Республикасы Президентиниӊ «Жаслар менен ислесиӯди нәтийжели шөлкемлестириӯде  мәденият, көркем-өнер, спорт, мәлимлеме технологиялары, китап оқыӯға кызығыӯшылығын асырыӯ бойынша 5 әҳмийетли басламаны әмелге асырыӯ ҳаққында»ғы қарарыныӊ орынланыӯы бойынша Қанлыкөл районында фестиваль болып өтти.   Жаслар фестивалы шеӊберинде, дәслеп, спорттыӊ жуӯырыӯ түри бойынша «Жаслар марафоны» спорт жарысы болып өтти. Онда, ер ҳәм қыз балалар арасында өзлериниӊ шаққанлығы ҳәм епшиллиги менен айрықша нәтийже көрсеткен жасларға шөлкемлестириӯшилер тәрепинен, Диплом ҳәм баҳалы саӯғалар тапсырылды.

  Соӊ, жаслар менен ашық сәӯбет өткериӯ мақсетинде, «Ҳәким ҳәм жаслар» ушырасыӯы шөлкемлестирилди. Онда район ҳәкими Д.Толыбаев жаслар менен сәӯбетте болды ҳәм олардыӊ усыныслары, пикирлери менен қызықсынды. Сондай-ақ, усы шеӊберде, пән олимпиадаларында, спорт жарысларында ҳәм жәмийетлик жумысларда белсендилик көрсетип киятырған бир қатар жаслар Диплом менен сыйлықланды.  Буннан соӊ, жасларды исбилерменликке тартыӯды мақсет еткен «Бизнеске саяхат» жойбарлары негизинде семинарлар болып өтти.   Жәмийет арасында өзиниӊ айрықша мийнетлери менен көзге түскен ҳәм жетискенлиги мол республикамыз жаслары қатнасында, «Сиз сүйген қаҳарман» жойбары тийкарында, «Ниҳол» мәмлекетлик сыйлығыныӊ ийеси Ш.Турсынбаев ҳәм Зульфия атындағы мәмлекетлик сыйлықтыӊ лауреаты С.Қайыпназаровалар менен сәӯбет шөлкемлестирилди.

   Соныӊ менен бир қатарда, усы фестиваль шеӊберинде, жас қәлемкешлер қатнасында, «Қанлыкөл-мениӊ нәзеримде» сүрени астында сүӯретлер таӊлаӯы, «Китаплар кәрӯаны» жойбары шеӊберинде, китаплар ярмаркасы болып өтти.

  Сондай-ақ, «Мен жумысқа жайластым» жойбары шеӊберинде, жаслардыӊ бәнтлигин тәмийинлеӯ мәселеси айрықша итибар астына алынды. Бул бойынша оларға тийисли кеӊеслер берилди. Фестиваль даӯамында, жаслар ортасында «Кибер спорт» бойынша виртуал спорт жарысы шөлкемлестирип, бунда жаслар өзлериниӊ активликлерин көрсетти.

   «Бес баслама-бес имканият» жаслар фестивалы жуӯмағында, райондағы 19-санлы Балалар музыка ҳәм көркем-өнер мектеби оқыӯшылары ҳәм районлық Мәденият бөлими тәрепинен таяранған йошлы концерт бағдарламасы инам етилди.