«Жас келин-күйеӯлер инновациялық мектеби»-шаӊарақлар беккемлиги ушын хызмет етеди



  Қанлыкөлде «Жас келин-күйеӯлер инновациялық мектеби» иске түсти. Бул мектеп, Ҳүрметли Президентимиздиӊ арнаӯлы тапсырмаларына муӯапық, Қарақалпақстан Республикасы Ҳаял-қызлар комитети,  Өзбекстан Республикасы Министрлер Кабинети жанындағы «Оила» илимий-изертлеӯ орайы Қарақалпақстан Республикасы басқармасы, Өзбекстан Жаслар аӯқамы Қарақалпақстан Республикасы Кеӊеси, “Оила” илимий-әмелий изертлеӯ орайы районлық бөлими ҳәм Өзбекстан Жаслар аӯқамы районлық Кеӊеси менен биргеликте шөлкемлестирилди.

Инновациялық мектепти ашыӯдан тийкарғы мақсет, жасларды турмысқа таярлап барыӯ, болажақ келин-күйеӯлерге шаӊарақлық мүнәсибетлердеги теӊсалмақлылықты сақлаӯдыӊ өзине тән көнликпелерин сиӊдириӯ ҳәм соныӊ менен бир қатарда, жас келин-күйеӯлер арасында келип шығатуғын турмыслық машқалаларға туӯры қатнас жасаӯдыӊ жол-жобаларын үйретип барыӯдан ибарат.

Иске түсирилген мектепте сабақлар жас келин-күйеӯлер қатнасында алып барылмақта. Оқыӯ ҳәптеде бир күн, яғный ҳәр ҳәптениӊ шемби күни оқытылады. Бул арнаӯлы оқыӯ курсында, шаӊарақ психологиясы, диний-мәнаӯий тәрбия, шаӊарақтағы ҳуқықый қатнасықлар, репродуктив саламатлық, шаӊарақ бюджети ҳәмде экономикасы ҳәм шаӊарақтыӊ беккемлигин тәмийинлеӯде мәҳәллениӊ орны сыяқлы жөнелислер бойынша билим ҳәм көнликпелер бериледи. Жаӊадан иске түсип атырған «Жас келин-күйеӯлер инновациялық мектеби»-шаӊарақлар беккемлиги ушын хызмет етеди.