Республикалық исши топар Қанлыкөл районында көшпели қабыллаӯ өткерди



  Бүгин Қанлыкөл районы Жаслар орайы имаратында Өзбекстан Республикасы Президентиниӊ мәсләҳәтшиси Турсынхан Худайбергенов басшылығындағы республикалық исши топар, Қанлыкөл, Шоманай ҳәм Қоӊырат районлары халықлары ушын көшпели қабыллаӯ өткерди. Ушырасыӯда Өзбекстан Республикасы Президенти мәсләҳәтшисиниӊ орынбасары Алишер Усманов ҳәм Қарақалпақстан Республикасы Министрлер Кеӊеси баслығы Қаҳарман Сариев сөзге шықты. Олар соӊғы жыллары усы районларда алып барылып атырған көлемли жумысларға айрықша тоқталып өтти.

  Ҳақыйқатында да, быйылғы жылы Қанлыкөл районы орайын абаданластырыӯ, социаллық ҳәм базар инфраструктуралық объектлериниӊ қурылыс ҳәм оӊлаӯ, жол қурылысы, инженерлик коммуникация тармақларын жақсылаӯ бойынша ири жойбарлар әмелге асырылды.

  Көшпели қабыллаӯ шеӊберинде, Өзбекстан Республикасы Ҳаял-қызлар комитети баслығыныӊ биринши орынбасары З.Маҳкамова тәрепинен, Қанлыкөл, Қоӊырат ҳәм Шоманай районларында жасаӯшы, нәгиранлығы болған ҳаял-қызларға реабилитация әсбаплары (6 нәгиранлық арбашасы, 4 еситиӯ аппараты ҳәм 2 қолтықтаяқ) тапсырылды.

  Республикалық исши топар тәрепинен бәрше тараӯлар бойынша, арнаӯлы ханаларда халықтыӊ мүрәжатлары тыӊланды ҳәм тийислилигинше көрип шығылды.