Қанлыкөл районының жергиликли бюджетиниң 2019-жылғы тийкарғы параметрлерин тастыйықлаў ҳаққында

Өзбекстан Республикасы “Бюджет кодекси”ниң ("Өзбекстан Республикасы Нызам ҳүжжетлери топламы", 2013-жыл 31-декабрь,
52-(I)-сан) 27-статьясы, Өзбекстан Республикасы Президентиниң 2018-жыл 26-декабрдеги «Өзбекстан Республикасының 2019-жылғы тийкарғы макроэкономикалық көрсеткишлер прогнозы ҳәм Мәмлекетлик бюджети параметрлери ҳәмде 2020-2021-жылларға бюджет бағдарлары ҳаққында»ғы ПҚ-4086-санлы ҳәм «Жергиликли мәмлекетлик ҳәкимият ҳаққында»ғы Қарақалпақстан Республикасы Нызамының 24-статьясына муўапық, Халық депутатлары Қанлыкөл районлық Кеңеси

Қ А Р А Р   Е Т Е Д И:

1. Қанлыкөл районы 2019-жылға жергиликли бюджетиниң болжаў параметрлери ҳаққында районлық қаржы бөлими баслығы У.Давлетовтың баянаты мағлыўмат ушын қабыл етилсин.

2. Қанлыкөл районының жергиликли бюджетиниң 2019-жылғы тийкарғы параметрлери 1- ҳәм 2-қосымшаларға муўапық тастыйықлансын.

3. Қанлыкөл районы ҳәкиминиң биринши орынбасары А.Абдразаков, районлық мәмлекетлик салық инспекциясы (Т.Туреев), районлық қаржы бөлими (У.Давлетов) пенен биргеликте районның жергиликли бюджет дәраматлар көрсеткишлерин салық түрлери бойынша белгиленген режелерин асырып орынланыўын тәмийинлесин.

4. Районлық қаржы бөлими (У.Давлетов) бюджет қәрежетлеринен пайда болған қосымша қаржылар дереги есабынан районды социаллық-экономикалық раўажландырыў бойынша ис-иләжларды әмелге асырыў ушын зәрүр өзгерислер киритип барыў;

районның жергиликли бюджетиниң шереклер бойынша бөлистирилиўин тастыйықлаў ҳуқықы берилсин ҳәмде жылдың ҳәр шереги бойынша мөлшерлеп қойылған макроэкономикалық көрсеткишлериниң орынланыўы ҳәмде жергиликли бюджет орынланыўы нәтийжелери тийкарында жергиликли бюджеттиң көрсеткишлерине зәрүрликке қарап анықлық киритип барыў;

халық депутатлары районлық Кеңесине жергиликли бюджеттиң орынланыўы ҳаққында ҳәр шерек жуўмағы менен мағлыўмат берип барыў тапсырылсын.

5. Халық депутаталары Қанлыкөл районлық Кеңесиниң 2018-жыл
27-декабрьдеги “Қанлыкөл районының жергиликли бюджетиниң 2019-жылғы тийкарғы параметрлерин тастыйықлаў ҳаққында”ғы 184/50-05-санлы қарары өз күшин жойтқан деп есаплансын.

6. Усы қарар “Қанлыкөл хабарлары” газетасы ҳәм район ҳәкимлигиниң рәсмий веб-сайтында жәриялаў усыныс етилсин.

7. Усы қарардың орынланыўын қадағалаў Халық депутатлары районлық Кеңесиниң жергиликли бюджет, экономикалық реформаларды әмелге асырыў ҳәм исбилерменликти раўажландырыў мәселелери бойынша турақлы комиссиясына (С.Садыков) жүклетилсин.

8. Усы қарар қабыл етилген күннен баслап күшке киреди.

 

Сессия басқарыўшысы

                                  С.Садыков

 

 

 

Сессия хаткери

                              Р.Матчанова