#Deputat_ushırasıwı

Xalıq deputatları Qanlıkól rayonlıq Keńesine 12-sanlı «N.Dawqaraev» saylaw okruginen saylanǵan deputat U.Durimbetova ózi tárepinen 2023-jıldıń 6 ayı dawamında ámelge asırılǵan jumısları boyınsha saylawshılarǵa esabat berdi.
Atap ótilgenindey, sońǵı jıllarda elimizde, ásirese, Qaraqalpaqstan Respublikasında kóplegen jańalanıwlar, xalıq penen islesiwde aytarlıqtay jumıslar ámelge asırılmaqta.
Sonıń ishinde, Qanlıkól rayonı boyınsha xalıqtıń mashqalaların sheshiwde ámelge asırılǵan jumıslardıń nátiyjesinde 2015-jılǵa salıstırǵanda, xalıqtıń elektr energiyası, gaz hám taza ishimlik suwı menen támiyinleniwi arttırılıp, ishki jollardı ońlaw, balalardı baqshaǵa qamtıw kórsetkishleri de biraz joqarıladı.
Bıyılǵı jıldıń 6 ayı dawamında Xalıq deputatları Qanlıkól rayonlıq Keńesiniń 6 sessiyası ótkerilip, onda 94 másele kórip shıǵıldı.
– Atap aytqanda, 36 másele sektor basshıları, mákeme, kárxana hám tiyisli shólkem basshılarınıń esabatı, 45 másele basshılardıń málimlemesi bolsa, bir qatar basqa máseleler de deputatlar tárepinen dodalanıp, tiyisli qararlar qabıl etildi,-deydi deputat U.Durimbetova.
Ózim de deputat sıpatında 6 márte xalıq penen ushırasıwlar ótkerip, úyme-úy júrip mashqalalardı anıqlaw hám onı unamlı sheshiwge háreket ettim. Ushırasıwlar dawamında 4 mashqalalı máseleler kóterildi. Sonnan 1 másele sol kúnniń ózinde sheshilgen bolsa, 3 másele qadaǵalawǵa alınıp, rayon hákimligine, tiyisli ministrliklerge 3 deputatlıq soraw jolladım. Qáwenderler menen birgelikte 15 shańaraqtıń jaǵdayınan xabar alındı.
Sonı da ayrıqsha atap ótiwimiz tiyis, Prezidentimiz tárepinen Qaraqalpaqstan Republikasın sociallıq-ekonomikalıq rawajlandırıw baǵdarında bir qansha párman hám qararlar qabıl etildi.
Tiyisli qararlar tiykarında, Qanlıkól rayonında barlıq dárekler esabınan 2022-2023-jıllarda 6 máhálledegi 8 obektte 8 mlrd. 304,0 mln. sumlıq qurılıs ońlaw jumısları alıp barıldı.
Sonnan Doslıq mákán puqaralar jıyını aymaǵında Doslıq-6 hám Doslıq-7 kóshelerine orraylasqan ishimlik suwı tarmaǵın jańadan tartıp aymaq turǵınları taza ishimlik suwı menen támiyinlendi.
Búgingi kúnde Ministrler Kabinetiniń 2022-jıl 6-oktyabrdegi «Qaraqalpaqstan Respublikası aymaqların sociallıq-ekonomikalıq rawajlandırıw, qolaylı biznes ortalıǵın jaratıw, innovaciyalıq texnologiyalardı engiziw hám infrastrukturalar menen támiyinlengenlik dárejesin jáne de jaqsılaw arqalı xalıqtıń abadanlıǵın arttırıwdıń qosımsha ilajları haqqında»ǵı qararınıń orınlanıwın támiyinlew maqsetinde, rayonda 15 kilometrlik, bahası 3 mlrd. 190 mln. sumlıq ishki jollarǵa qum shaǵıl tas aralaspasın jayıw jumısları ámelge asırılıwı rejelestirilgen.
Házirgi waqıtta bul qurılıs ońlaw jumısları 85 procentke orınlanǵan. Bul boyınsha rayonlıq Keńes deputatları menen birgelikte deputatlıq qadaǵalaw jumısları alıp barılmaqta.
“Doslıq” mákan puqaralar jıyınınan 0,15 km jol tolıq islenip paydalanıwǵa tapsırılǵan.
Usınday keń kólemli jumıslardan orınlı paydalanıp, qıytaq jerleri bar puqaralarımız, jerlerdi házirden baslap tayarlap, jap-salmalardı tazalap, isbilermenlik penen shuǵıllanıwdı qálewshiler bolsa, hákim járdemshisiniń usınısı menen jeńilletilgen kreditler alıp, óz isbilermenligin baslaytuǵın waqtı keldi.
Jaqsı niyetler menen baslanǵan jumıs, álbette, jaqsı nátiyjeler beredi.
Sonday-aq, ilajda Joqarǵı Keńes Baslıǵınıń barlıq, qala rayonlarda xalıqtıń arasında júrip, mashqalaların tıńlap, olardı sheshiw boyınsha dúzilgen anıq, mánzilli rejeleriniń nátiyjeleri, búgingi kúnge shekem dawam etip atırǵan «Mehir háreketi» sheńberinde járdemge mútáj insanlarǵa berilip atırǵan járdemler, «Ashıq byudjet», «Máhálle byudjeti» haqqında maǵlıwmatlar berildi.
Ushırasıw dawamında jańadan qabıl etilgen qarar hám pármanlardıń mazmun-mánisi hám áhmiyeti haqqında aymaq turǵınlarına úgit-násiyat jumısları alıp barıldı. Sonday-aq, puqaralardıń múrájatları tıńlanıp, deputatlıq qadaǵalawǵa alındı.

Ushırasıwda aymaq belsendileriniń pikir-usınısları hám mashqalaları tıńlanıp, sheshimin tabıwı kerek bolǵan máseleler boyınsha tiyisli mákeme-kárxanalarǵa deputatlıq sorawlar jiberiletuǵınlıǵı belgilep alındı.