Kóshpeli sud májilisi
Jınayat isleri boyınsha Qanlıkól rayonı sudı baslıǵı M.Bekimbetov tárepinen Qanlıkól rayonı «Mádeniyat» MPJ aymaǵı “Jaslar orayı” imaratında kóshpeli sud májilisi ótkerildi.
Kóshpeli sud májlisinde jámi 32 túrdegi hár túrdegi jınayıy hám hákimshilik huqıqbuzarlıq isleri kórip shıǵılıp solardan Ózbekstan Respublikası Hákimshilik juwapkershilik haqqındaǵı kodekstiń 131-statyasında transport quralların más halında basqarǵanlıǵı ushın 4 puqaraǵa hákimshilik juwapkershilik isi kórip shıǵıldı jánede Qanlıkól rayonı ishki isler bólimi jámiyetlik qáwipsizlik xızmeti probaciya toparı esabında turıp jaza múddetin ótep atırǵan 2 shaxstıń jaza ótew dáwirinde islegen jınayatınan shın kewilden pushayman bolıp, miynetke hadal múnásibette bolǵanlıǵı ushın rayon sudı tárepinen Ózbekstan Respublikası Jınayat Kodeksiniń 73-statyasına tiykar jazadan múddetinen aldın azat etildi hámde probaciya toparı esabında turıp jaza múddetin qastan ótemesten kelgen 1 shaxstıń qarsısına toplanǵan material Ózbekstan Respublikası Jınayat Kodeksiniń 46-statyasına tiykar ótelmegen jazası erkinen ayırıw jazasına almastırıldı.
Sonday-aq, Qanlıkól rayonı ishki isler bólimi jámiyetlik qáwipsizlik xızmeti huqıqbuzarlıqlar profilaktikası bólimi, profilaktika inspektorları tárepinen Qanlıkól rayonı aymaǵında hákimshilik huqıqbuzarlıq islegenligi ushın irkilip, qarsısına hújjetler rásmiylestirilip, sudqa ótkerilgen 6 puqaraǵa, Ózbekstan Respublikası Hákimshilik juwapkershilik haqqındaǵı kodeksiniń 183 hám 194-statyalarına tiykar 10 sutka hám 15 sutka hákimshilik qamaq jazaları tayınlandı.
Sud májilisi sońında qatnasqan puqaralarǵa, hákimshilik huqıqbuzarlıqlar islemew, hár túrdegi jınayatlardıń aldın alıw boyınsha huqıqıy túsinikler berip ótildi.
Qanlıkól rayonı hákimliginiń málimleme xızmeti.
