Huqıq qorǵaw uyımlarınıń muwapıqlastırıwshı Keńes májilisinde
Rayonda nızam ústinligin támiyinlew, nızamshılıqtı bekkemlew, jınayatshılıq hámde huqıqbuzarlıqlardıń aldın alıw boyınsha 2023-jıldıń 1-yarımında ámelge asırılǵan jumıslar, jol qoyılǵan kemshiliklerdi dodalaw hámde aldaǵı wazıypalardı belgilep alıw máselelerine arnalıp ótkerilgen Qanlıkól rayonı huqıq qorǵaw uyımlarınıń muwapıqlastırıwshı Keńes májilisine, rayon hákimi B.Sultanov, rayon mákeme, kárxana hám shólkem basshıları qatnastı.
Májiliste bul boyınsha, rayon prokurorı M.Tileumuratovtıń málimlemesi tıńlandı. Atap ótilgenindey rayon prokuraturası tárepinen 2023-jıldıń 6 ayında rayon aymaǵında nızamshılıqtı bekkemlew, puqaralardıń huqıq hám erkinlikleri, jámiyet hám mámleket máplerin qorǵaw, jınayatshılıqqa qarsı gúresiw baǵdarında bir qansha nátiyjeli jumıslar ámelge asırılǵan.
Tikkeley rayon prokuraturası tárepinen nızamlılıqtı bekkemlew, puqaralardıń huqıq hám erkinliklerin qorǵaw, jınayatshılıq hám huqıqbuzarlıqtıń aldın-alıw barısında ótkerilgen 80 ge jaqın ilajlar nátiyjelerine kóre, 194 prokurorlıq baqlaw hújjetleri qollanılıp 87 shaxstıń buzılǵan huqıqları tiklengen.
Protest keltiriw jolı menen 79 nızamsız hújjetleri nızamǵa muwapıqlastırılǵan, nızam buzılıwı, onıń kelip shıǵıw sebepleri hám oǵan imkániyat jaratıp berip atırǵan shárt-sharayatlardı saplastırıw xaqqında 37 usınıs kiritilgen. Prokuror qararı hám usınısı boyınsha 73 shaxs intizamiy, 56 shaxs hákimshilik juwapkershilikke tartıldı. 91 mln 108 mıń swm keltirilgen zıyan ıqtıyarıy óndirilgen. Puxaralıq sudlarǵa 33 mln 560 mıń swm, ekonomikalıq sudlarǵa 6 mln 325 mıń swm zıyandı óndiriw júzesinen 4 dawa arza kiritilip, qopal nızambuzıwshılıqlar júzesinen 3 jınayat isi qozǵatılǵan.
Kriminogen jaǵdaydan kelip shıǵıp, rayonnıń barlıq puqaralar jıyınların “qızıl”, “sarı” hám “jasıl” túrlerge ajıratqan halda, olarda “máhelle” dúziminde jınayatshılıqtıń aldın alıw islerin sistemalı jolǵa qoyıw hámde jınayatshılıq kóbeygen aymaqlarda puqaralardıń hám yuridik shaxslardıń múlkiniń qorǵalıwın támiyinlew, sonday-aq, múlikke bolǵan topılıstı, shaxsqa qarsı jınayatlardı profilaktika qılıw hám aldın alıw maqsetinde texnikalıq qorǵaw punktlerine (pult) jalǵaw, kamera ornatıw máselelerine itibar qaratılıwı lazımlıǵı atap ótildi.
Májiliste kórilgen másele boyınsha esbatlar hám usınıslar dodalanıp, huqıq qorǵaw organlarınıń muwapıqlastırıwshı Keńes májilisiniń tiyisli qararı qabıl etili.
Qanlıkól rayonı hákimliginiń málimleme xızmeti.
