Salıq nızamshılıǵına kiritilgen ózgerisler hám Salıq uyımlarınıń, olardıń lawazımlı shaxslarınıń qararları, hárekerleri (háreketsizligi) ústinen berilgen arzalardı kórip shıǵıw.
Mamleketimizdi sociallıq-ekonomikalıq jaqtan jedil rawajlandırıw, isbilermenlikti qollap-quwatlaw hám de básekilik sháriyatlardı jaratıw maqsetinde salıqlardı azaytıw hám salıq haqqındaǵı nızamshılıqlardı jánede jetilistiriw boyınsha qararlar qabıl etildi.
Atap aytqanda «Salıq hám byudjet siyasatınıń 2023-jılǵa mólsherlengen tiykarǵı baǵdarlar qabıl etilgenligi múnásibeti menen Ózbekstan Respublikasınıń ayırım nızam hújjetlerine ózgeris hám qosımshalar kiritiw haqqında»ǵı Ózbekstan Respublikasınıń 2022-jıl 30-dekabr kúngi 812-sanlı hám «Ózbekstan Respublikası Salıq kodeksiniń 483-statyasına qosımsha kiritiw haqqında»ǵı Ózbekstan Respublikasınıń 2023-jıl 18-iyul kúngi 857-sanlınızamlar qabıl etildi.
Usı Nızamda 2023-jıl ushın salıq siyasatınıń tiykarǵı baǵdarları belgilenip, olarda qosılǵan qun salıǵı boyınsha salıq stavkaların páseytiwi, ayırım taypadaǵı salıq tólewshiler ushın payda salıǵınan hám sociallıq salıqlardan jeńillikler beriliwi, aylanbadan alınatuǵın salıq boyınsha salıq stavkalarınıń unifikaciya qılınıwı, anıq sumda belgilengen salıq stavkalarınıń kútilip atırǵan inflyaciya dárejesinen kelib shıqqan halda indeksaciya qılınıwı, sonday-aq byudjetge tóleniwi lazım bolǵan salıqlardıń tolıq jıynalıwına qaratılǵan sharalar názerde tutılǵan.
Salıq uyımlar menen múnásibetlerde puqaralar hám isbilermenlik subektleriniń huqıqlarınıń nátiyjeli qorǵalıwın támiyinlew boyınsha salıq uyımların, olardıń lawazımlı shaxslarınıń qararları, háreketleri (háreketsizligi) ústinen berilgen shaǵım arzalar hákimshilik sudları tárepinen kórip shıǵıladı.
Atap aytkanda salıq uyımlarıń kóshpeli salıq tekseriwi hám salıq auditi nátiyjeleri boyınsha qabıl etilgen qararlar ústinen berilgen arzalar joqarı turıwshı salıq uyımı tárepinen nızamda belgilenbegen múddette kórip shıǵılmaǵanlıǵı, salıq tólewshilerdiń belgilengen muddet ótkennen keyin salıq uyımlarınıń qararları ústinen sudta tartısıw huqıqınan ayırmaydı.
Sonıń menen birge, salıq tólewshi joqarı turıwshı salıq uyımlarınıń lawazımlı shaxslarınıń shaǵımdı múddetinde kórip shıqpaǵan háreketsizligi ústinende arza (shaǵam) menen murájáát etiw huqıqına iye.
Nızamlarǵa kirgizilgen ózgerisler puqaralarǵa hám isbilermenlik subektlerine hákimshilik sudlarǵa múrájáát etiwde jeńillikler payda etedi hám hákimshilik sudlar tárepinen olardıń buzılǵan huqıqların tiklewde oǵada áhmiyetke iye.
Bul bolsa xalıqtıń sudqa bolǵan isenimin bekkemlewge, sudlardıń islerdi kóriw nátiyjeliligin asırıwǵa xızmet etedi.
Nókis rayonlar aralıq
hákimshilik sudınıńsudyası R.T.Jumabaev
