Jaslar bir maqset jolında birlespekte.

Mámleketimizde ámelge asırılıp atırǵan “Jasıl mákan” ulıwma milliy joybarı sheńberinde qala hám rayonlardıń aymaqlarında hár túrli dekorativ hám miyweli terek nálleri egilmekte. Qanlıkól rayonı hámmemizge málim respublikamızdıń oraylıq rayonlarınan biri. Onı abadanlastırıw, kóklemzarlastırıw hám hár qıylı terek nállerin egiw isleri búgin qızǵın túske engen.

Ózbekstan Jaslar isleri agentligi Qanlıkól rayonı bólimi aymaqlarda jaslar jetekshileri hámde jaslar awqamı Kamalak shólkemi sardarları menen birgelikte bul ǵalabalıq iske basqalarǵa úlgi bolıp kiristi. Rayon hakimligi hám jaslar hár kúni bul iste basqalarǵa bas bolıp nál egiw islerine qatnasır atı.

Rayon xalqı házirgi kúnde 53300 den asqan bolsa sonnan,   14-30 jas aralıǵındaǵı jaslar sanı 12403, 10-14 jas aralıǵındaǵı Kamalak shólkemi aǵzaları sanı 2785 jastı quraydı.

Rayonda “Jasıl mákan” ulıwma milliy joybarı sheńberinde nál egiletuǵın maydanlar belgilengen bolıp, «Jaslar baǵı»n, Nuranıylar, Analar, Máhálle hám Awıl baǵların jaratıw boyınsha ilajlar belgilengen.

Hár kúni tań azanda usı jıldıń 11-oktyabr kúni húrmetli Prezidentimiz tárepinen keńeytilgen tárizde ótkerilgen videoselektor májilisinde bıyılǵı jılı gúz máwsiminde 25-oktyabr hám 1-dekabr sánesi aralıǵında “Jasıl mákan” ulıwma milliy joybarı sheńberinde respublikamız boylap terek hám puta nállerin egiw baslamasına qatnasıp atırǵan jaslar úlesin qansha ulıǵlasańda arzıydı.

Qanlıkól rayonında “Jasıl mákan” ulıwma milliy joybarı sheńberinde usı jılı gúz máwsiminde 280 mıń túpten aslam túrli sayamanlı hám miyweli   terek nállerin egiw rejelestirilgen. Bul sawaplı iske rayon jasları Jańa Ózbekstan – Jasıl mákanda birge jasayıq! Súreni tiykarında birlesip, jasap turǵan aymaqtıń jánede abat bolıwına óz úleslerin qosıp atır.

Qanlıkól rayonı hákimliginiń málimleme xızmeti.