«Ustaz bilim jaratıwshısı» birinshi respublikalıq qurıltayı

Elimizde oqıwshı jaslarǵa bilim beriwdiń sapalılıǵın asırıw menen bir qatarda oqıtıwshı pedagog kadrlardıń bilimin jetilistiriw óz-ara tájiriybelerin asırıw islerinede ayrıqsha itibar qaratılmaqta.

Búgin respublikamız barlıq orınlarında «Ustaz bilim jaratıwshısı» birinshi respublikalıq qurıltayı bolıp ótti. Bul ilajdı ótkeriwden maqset bilimlendiriw tarawında ámelge asırılıp atırǵan sociallıq-ekonomikalıq reformalardı birgelikte ámelge asırıw, oqıtıwshılardı birden-bir kúshke aylandırıw hámde tarawda bar bolǵan mashqalalar sheshimin tabıw, bul boyınsha anıq usınıslar beriw arqalı oqıtıwshılar abroyın asırıw hám bilimlendiriw sıpatın bekkemlewden ibarat.

Qanlıkól rayonında bolıp ótken «Ustaz bilim jaratıwshısı» birinshi respublikalıq qurıltayınıń rayon basqıshana rayonlıq mektepke shekemgi hám mektep bilimlendiriwi bólimine qaraslı barlıq ulıwma orta bilim beriw mekteplerinen tórt baǵdar boyınsha oqıtıwshılar qatnastı. Dáslep jıynalǵanlardı rayon hákimligi, Qaraqalpaqstan Respublikası mektepke shekemgi hám mektep bilimlendiriw ministrligi hám rayonlıq bólimi wákilleri ótkerilip atırǵan kurıltay áhmiyetine toqtaldı.

Atap ótilgenindey ilaj tórt baǵdarda, «Baslanǵın bilim», «Anıq pánler», «Tábiyiy pánler» hám «Ana tili hám ádebiyatı» jónelisleri boyınsha hár bir baǵdar boyınsha tayarlanǵan trener oqıtıwshılar tárepinen oqıw trningleri alıp barıldı.

Respublikamız bilimlendiriw tarawında birinshi ret ótkerilip atırǵan bul ilaj bilimlendiriw tarawında mashqalalardıń sheshim tabıwına hám jaslarǵa bilim beriwdiń sapasın asırıwǵa tiykar bolıwları menen áhmiyetli sanaladı.

Qanlıkól rayonı hákimliginiń málimleme xızmeti.